Andaman-a lut ru Myanmarese paruk man

Andaman-a lut ru Myanmarese paruk man
Andaman & Nicobar Command leh union territory police chuan a huhova beihpui an thlaknaahTillang Chong thliarkar biru takah Myanmarese luh ruk tum paruk an man tih Pathianni khan officer-in a sawi.
Heng mite hi Operation Castle Bay-ah Inrinni khan man niin Pathianni khan Nancowry police station-ah Tillang Chong Islands atang hian lak an ni tih officer chuan a sawi.
Officer hian November 8 khan Coast Guard Dornier thlawhna khalhtuin tih dan thin pangngaia patrolling a neihnaah ram dang lawngleng a hmu a. Command hriattirin IRBN thuneitute, Tillang Chong Look-out-Post-a awmte hrilh chhawn leh an ni tih a sawi.
Operation Castle Bay kalpui nghal niin ram dang mi, Tillang Chong ramngawa lo awmte chu man an ni ta a ni.
Andaman & Nicobar Police DGP Hargobinder Singh Dhaliwal-a chuan, “Ram dang lawngleng, dawnfawh thahnem tak phur hi Tillang Chong khawchhak lamah hmuh a ni a, khawthlang lama kan LoP-in an awmna hmun hi an finfiah zui a ni,” a ti.
Heng lai vel hi a hmunhma a chhengchhe hle a, a bikin ni tlak hnuah phei chuan chet a harsa tak zet tih a sawi.
DGP chuan, “Team hi thliarkara hmun kilkhawr takah hian an lut a. Drone nen thawk chhuakin Inrinni khan nasa takin an zawng a, man chhuah an ni ta a. Police leh sipaiten hma an la a, Navy, Air Force leh Coast Guard pawhin an pui a, thawhhona tha tak hnuaiah hma lak a ni,” tiin PTI a hrilh.
“Andaman & Nicobar Police chuan kan thliarkara khualrel thilte leh India-in tuipuia ramri a neihte hum turin theihtawp a chhuah zel dawn a, kan thlirkar a hima a mi chengte zalen taka an awm theih nan kan thawk zel dawn a ni,” tiin DGP chuan a sawi.
September thla khan Andaman & Nicobar Police chuan ram dang mi lut ru 23 an lo man tawh a, hemi tum hian tuipui dawnfawh kg 550 dawn man tel an ni a. Hetiang dawnfawh hi a mang mai hlauhawm a ni a, tuifinriat chhuata awm thin niin chaw atana hmang pawh an awm a ni.
Tuipui feet 30 atanga 60 inkar velah an awm ber thin a, awlsam taka lak theih pawh an ni a. Ei atan bakah damdawia hmang an awm a, khawvel pum huapa ei tur tui leh man to ber bera telh thin niin khawvel pumah hralh chhuah thin a ni.
Andaman & Nicobar Police-in an chhinchhiah dan chuan kum 2022 khan Myanmarese 66, 2023-ah 98, 2024-ah 70 leh 2025-ah 73 man an ni tih an tar lang.