Andhra naupang Zika virus vei nia rinhlelh a ni
Andhra Pradesh, Nellore district chhunga Venkatapuram khaw naupang kum 5 mi chu Zika virus a vei nia hriat a ni a, a thisen endik turin Pune-a National Institute of Virology (NIV) a thawn a ni.
Nellore district collector O Anand chuan Zika virus vei nia rinhlelh naupang an neih thu sawiin, an laboratory-ah proof-na a awm loh avangin NIV, Pune-ah an thawn mek thu a sawi a, a thisen endik result an hriat veleh chiang zawka thil thlen dan puanna an la neih tur thu a sawi.
Anand hian mipuite chu chiai lo tur leh thlamuang taka awm turin a ti a, rapid response team an awm tawh avangin fimkhur ngaihna zawng zawng engkim inpeih vek a nih thu a sawi bakah, sample an thawn pawh hi la negative thei a nih thu a sawi.
Tin, an rinhlelh naupang chu Zika virus lanchhuah dan engmah a taksa a awm lo, travel history nei miah lo a ni bawk tih Anand chuan a sawi a, an laboratory-a an ennaah Zika virus nia an hriat avang chauha endik lehzual tura a bik taka siam hmuna thawn an nih thu a sawi bawk a ni.
Andhra naupang Zika virus vei nia rinhlelh a ni
