Andra CM atan Chandrababu Naidu la lut

Telugu Desam Party (TDP) national president N. Chandrababu Naidu chu Andra Pradesh Chief Minister atan lakluh a ni ta.
Governor S. Abdul Nazeer chuan Naidu hi Vijayawada bul lawk Gannavaram hnaih taka Kesarapalle ah rinawmna thu tiamtirin a la lut a. Tun hi Naidu-an kum sawm li vel politics a khelh chhunga Chief Minister atana tum li lai lakluh a tawnna a ni tawh.
Naidu lakluhnaah hian Prime Minister Narendra Modi, Vice President hlui M. Venkaiah Naidu, Union Home Minister Amit Shah, Medical and Health Minister leh BJP National president JP Nadda, Union Ministers G. Kishan Reddy leh Bandi Sanjay, Chief Justice of India hlui N.V. Ramana, matinee idols Rajinikanth leh Chiranjeevi bakah VVIP dang tahhnem tak an tel.
The Jana Sena Party (JSP) Chief Pawan Kalyan, leh TDP MLA 24, Bharatiya Janata Party (BJP), leh JSP member te pawh Cabinet ministers atan lakluh an ni a, Naidu telin cabinet member 25 lai an awm a ni.
TDP, JSP leh BJP te chuan National Democratic Alliance (NDA) hmingin Assembly elections 2024-ah khan YSRCP an khing a. Ruling YSR Congress Party (YSRCP) te chuan 11 Assembly seats chauh changin a dang zawng chu NDA ten an la vek a. Andra Pradesh ah hian MLA seat 75 a awm a ni.
TDP te chuan Assembly constituency 135-ah chakna an chang a, JSP leh BJP te chuan 21 leh 8 an la thung a ni. Naidu chuan JSP te hnenah hian cabinet pathum pe in BJP te hnenah pakhat a pe thung. Naidu chuan National Democratic Alliance (NDA) partners tena an share an chan ngei theih nan ruahmanna a siam a. MLA 7 nei zelah minister pakhat zel ang pe in JSP te chuan seat 21 an lak avangin cabinet member pathum an nei a, BJP te chuan seat 8 an lak avangin minister pakhat an chang a, a bak zawng chu TDP ten an chang ta a ni.
Kalyan chu Deputy Chief Minister atana dahin portfolio pawimawh a chan ngei rin a ni a. Cine actor politician a inlet ta hian TDP leh BJP te thawhdun theih nan nasa taka hma lain sulsutu ber a ni bawk. A tirah Kalyan chuan BJP leader te chu TDP te nena thawkho turin a nawr a, hnial fithlak thak a ni phawt a. Mahse, a hnuah TDP, JSP leh BJP te chu YSRCP te paihthla turin thawkho theiin a siam zui ta a ni.
Kolusu Parthasarathy, inthlan hma chiaha YSR Congress party (YSRCP) atanga TDP a lut chuan Cabinet a chang bawk.
Kum 2014-19 a TDP rorel hmasaka minister ni thei zinga pahnih K. Atchannaiu (TDP AP president) leh P. Narayana te chauhin tun tumah cabinet an chang bawk. N. Md Farooq, senior minority politician TDP dintirh atanga la tel ngar ngar chu tun tum cabinet a minority awm chhun a ni bawk.
BJP minister neih chhun Satya Kumar Yadav, Dharmavaram Assembly constituency atanga thlan tlin chu India Vice President hlui M Venkaiah Naidu thuihhruai hnai tak niin BJP National Secretary ni lai mek a ni bawk.
Naidu hian senior leader leh MLA Gorantla Buchaiah Chowdary leh Dhulipala Narendra ang te chu thlauh thlain minister pawh lo ni tawh Somireddy Chandramohan Reddy, Nimmakalayala Chinna Rajappa, Kaluva Srinivasulu, Kala Venkat Rao, Ayyanna Patrudu te ang pawh a hnawl bawk.