Anpui kawp Muslim
puithiam thahna chhui zel
Muslim puithiam zinga a mipatpui kawp thin a ni tih inpuang hmasa ber nia hriat, Muhsin Hendricks-a thahna chu South Africa-a police0te chuan nasa takin an chhui zui a, a titu man ngei an tum tih Deputy Justice Minister Andries Nel chuan a sawi.
Kum 57 mi hi Inrinni khan tuipui kam khawpui, Gqeberha-ah chhun ên laiin a car-ah kah hlum a ni.
CCTV footage-ah chuan lu khuh chi kawr ha, pick-up truck-a chuangten Hendricks-a lirthei chhuak tur chu lo dangin a tukverh atangin an kap zui ta niin a lang.
Puithiam hi mipatpui kawp thin leh anpui kawp thinte awmna atana a awmna hmun siamtu anga hriat hlawh niin thah a ni hian hetiang chi, LGBTQ+ community an tih chu a nghawng hle.
Chhui hna hi thawh mek a ni a, Nel-a chuan tunah rih chuan huat vanga inthahna tia sawi ngawt chu a la har niin Newzroom Afrika TV channel hnenah a sawi.
Nel-a chuan Deputy Police Minister Polly Boshielo-a’n a sawi dan chuan officer-ten a titu nia hriatte hi an chhui zui mek tih a sawi.
Hendricks-a chu a ui thu Nel chuan sawiin, “South African a ni tih chhuang taka kan sawi thin a ni a, South African tam takte hnena nun dan tur hrilhtu a ni,” a ti.
Hendricks-a hma lakna hi Islam sakhaw rin dan ang lo tak niin an sakhua hian anpui kawp chu a phal lo a ni.
Hendricks-a kal dan hi pawm lo mah se South Africa-a sakhaw pawl lian tak, Muslim Judicial Council (MJC) pawhin inthahna hi an dem thu an sawi.
Muslim pawl lian dang, United Ulama Council of South Africa pawhin ‘rawng taka inthahna’ chu demin mipuite chu thuchiang a awm hma chu ngaihdan lo siam mai lo turin an ngen.
South Africa dan, kum 1994-a mi ngo rorelna a tawp hnua hman tanah chuan mi tu pawh, an kawppui duh zawng avanga enhran loh tur a ni a. Kum 2006 khan Africa ram zinga neih inang inneih pawm hmasa ber a ni tawh bawk.
Dan ang chuan LGBTQ+ community hi pawm ni mah se mawngkawhur bik chuan enhran leh an laka tharum thawhna pawh a thleng nasa hle tho va. An ram hi khawvela inthahna tamna ber a ni bawk.
Hendricks-a hi kum 1996-a a anpui kawp tih inpuang niin a chenna, Cape Town bakah hmun danga Muslim-te a barakhaih hle.
Hemi kum vek hian The Inner Circle a din zui a, a pawl din hi Muslim zinga amah ang chi Muslim-te thlawpa an himna tura beitu a ni a, ama enkawl Masjidul Ghurbaah mosque ngei pawh heng mite tan hian zalen takin a hawng bawk.
Kum 2022 khan a chanchin hi documentary siamin 2022 ‘The Radical’ tih a ni a, hetah hian tihthaihna leh vauna pawh a dawn nasat thin thu a sawi lang nghe nghe.
Anpui kawp Muslim puithiam thahna chhui zel
