NBA 2023-24 regular season khel chhunzawm zel a ni a. Milwaukee Bucks tan Giannis Antetokounmpo a vul chhunzawm zel. Antetokounmpo hian Pathianni zinga Atlanta Hawks an hneh tumin point 36 a thawkchhuak. Pathianni zinga inkhel dangah Celtics in Pelicans an hneh ve bawk.
Pathianni zinga inkhel hmuhnawm takah Milwaukee Bucks hian Atlanta Hawks lakah bul an tan tha viau a, quarter hmasa pathumah chungnung zawk an ni vek. Quarter hnuhnung berah point thumin hnufual zeuh mah se Hawks lakah hian point 122-113 in hnehna an chang tho thung. Bucks lakah tlawm bawk mah se Atlanta Hawks hian Eastern Conference-ah pahnihna an luah chhunzawm tho thung.
Hawks an hneh tumin Bucks tan Giannis Antetokounmpo a khel tha viau a, point 36 a thawkchhuak. Point 36 a thawhchhuah bakah hian ball sawhlet vawi 16 a dawng a, assist vawi sarih a nei tling bawk. Antetokounmpo hian Atlanta a ngam ve reng reng a, season kal meka vawi thum an hmachhawn tawhah point 94 a thawkchhuak a, ball sawhlet vawi 38 zet a dawng tling bawk. Most Valuable Player vawi hnih ni tawh Antetokounmpo hi season kal mekah a chetha viau a, khelh 34 ngawtah point 30 a thawhchhuah bakah ball sawhlet vawi 10 a dawng tling.
Pathianni zinga inkhel dangah Eastern Conference hmahruaitu Boston Celtics chuan point 104-92 in an khingpui New Orleans Pelicans an hneh. Celtics tan hian Jayson Tatum chuan point 23 a thawkchhuak a, Kristaps Porzingis 19 chuan point 10 thawkchhuakin, ball sawhlet vawi 10 a dawng tling bawk. Celtics rual hian Orlando Magic pawhin Memphis Grizzlies lakah point 118-88 in hnehna an chang ve bawk.
Antetokounmpo a vul
