Natna hrik (bacteria/virus) thattu damdawi ‘Antibiotic’ ei dan dik lova ei ten a hnu lama harsatna an tawh thin dan leh antibiotic damdawi ei dan dik chungchang hi damdawi lam mithiamten mipui min hrilh ngun malh malh ta hle a. Hei hi a pawimawh ngang a ni ang, khawvel huapa hriselna lam buaipuitu World Health Organisation (WHO) pawhin 2015 atang khan World Antimicrobial Resistance Awareness Week hi kum tin Nov 18-24 chhunga hman a rel a. Kuminah hian thupui atan ‘Educate, Advocate, and Act Now’ tih hman a ni a. Mizoramah pawh he Week hi hman mek a ni a, AMR week dungzuia health minister thuchah pawh tihchhuah a ni.
Antibiotic damdawi hi natna hrik that tura siam a nih rualin, a nihna tur anga ei loh chuan, natna hrikte hian antibiotic damdawi hnathawh an lo tinep theiin an lo dodal(resist) thei thin a. Natna hrik ten antibiotic hna thawk thei lova an lo siam theihna chhan chu, antibiotic damdawi chakna thahrui tang mar pât tur kha a khaihlak thin vang a ni.
Hei tak hi mipuiin kan hriat chian a pawimawh a, hrechiang tur chuan chhung tina awareness campaign neih hi a pawimawh em em dawn a. Hetia Week hman changa thuchah tihchhuah ringawt hi chuan chhung tin a thleng pha dawn lo tih a hriat a. A hrechiang sate hi kan inhrilh kual vel mai mai a, a hre tur taka te hi a hre pha lo an ni tlat thin a, chu chu a pawimawh lai tak a ni.
Tunlaiah IT kan chhawr tangkai tawh a, tunhmaa leaflet/brochure siam nana sum tam tak tak senso ang kha a ngai tawh lova, social media hmanga awmze nei taka theh darh theih a ni tawh. Hei pawh hi social media khawih thang leh khawih thang lo a la awm theih avangin, a kaihhnawih department hian khawtlang emaw, pawl emaw a thawhpui thiam a pawimawh dawn a ni. Mi tin hian kan hriat a pawimawh si a.
Tunhma deuh khan, damloten an nat dan chungchang an sawi atangin doctor-ten damdawi an chawh mai thin nia sawi a awm thin a. Sawi dan tlanglawn takah chuan, ‘phai lam doctor-te chuan investigation result an hmuh hma chuan damdawi an chawh nghal ngawt ngai lo’ tih a ni thin. Investigation tel lova antibiotic damdawi inchawh te hi a awm thin a nih a, antibiotic damdawi ei tul lo puiin antibiotic damdawi a lo ei khan damlo tan eng tianga pawi nge ni thei ang tihte pawh ngaihtuahnaah a awm thei awm e.
Thil kal tawh chu kal tawh a ni a, tun hnuah hi chuan investigation kaltlangin doctor-ten fimkhur takin damdawi an chawh thin. Antibiotic damdawi an chawh rual hian, antibiotic damdawi ei that loh hlauhawmzia hi doctor ngeite hian damlote hi lo hrilh ziah thin ta se, AMR hi a tlem phah ngeiin a rinawm.
Antimicrobial Resistance (AMR)
