Thawhtan zan khan English Premier League (EPL) ah inkhel pakhat a awm a, Villa Park-a inkhel; goal ruk zet luhnaah Aston Villa leh an mikhual Liverpool te 3-3 in an inhnehtawk. An mualah tlawm an pumpelh vangin Villa hian Champions League khelh phak an hnaih leh zual a. Thawhleh zana inkhelah Tottenham Hotspurs in point an hloh a nih chuan Villa hi UCL khel turin an tling chiang nghal ang.
Champions League khel phak chiang tura chak mamawh Aston Villa hian an mikhual Liverpool lakah bul an tan chhe hle a, goal an chhuah hma hle. Si nghak Emiliano Martínez chuan Harvey Elliott pet chu vanduaithlak takin a man pial a, an lamah a ti-goal. Hma takah goal an chhuah vangin an hnual a, an khingpuite hi an chunga awm an nih bawk si vangin an tan chak a harsat phah lehzual dawn hle. Liverpool hi pathumnaa awm chiang tawh an ni a, Villa laka an chak leh tlawmin awmzia a nei thui tawh lova, nuam ti takin an inlan thei.
Hma takah goal an chhuah vangin Villa in an si phurh sut ngei tumin tan an khawh zui chiam a, an hlawhtling thuai. Fuh taka an nawr tlang hnuin buai deuh nuaih nuaih karah Youri Tielemans chuan minute 12-naah chiang zetin a pet goal a, an si phurh a sut.
An si phurh an sut vangin phur viau mah se Villa an phur rei lova, goal an chhuah leh thuai. Liverpool hian fuh zetin an nawr tlang nawn leh a, Gody Gakpo chuan vei lam sir atanga cross tha zet chu awlsam zetin a pet goal a, minute 23-naah hma an hruai nawn lehna goal a thun. Gakpo goal thu hnu hian goal thun belh tumin an innawr tawn nasa viau a, inkhel a hmuhnawm zui hle. Innawr tawn in, hlauhawm siam thin mah se chawlhlawk hmain goal dang a luh belh thei lova, Liverpool in 22-1 a hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal an thun leh thuai. Second half tan atanga minute thumna lekah Jarell Quansah chuan free-kick atang ball kal tha tak chu far post, top corner-ah fuh zetin a tauh lut a, an goal thumna a thun. Team lian Liverpool lakah si hnih ngawt an hnufual vangin Aston Villa dinhmun a chhe viau tawh a, point mamawh tak chungin point an hmu zo dawn lo ngei niin a lang hman.
Si hnih phur tawh mah se, point an mamawh em vangin Aston Villa in goal thun tumin thapui an thawh a, hun tawp dawn hnaihah an thawhrim rah an seng a, goal hnih an thun. Offside vanga Villa goal leh Mohamed Salah goal thun hnawl a nih hnuin hun tawp dawn hnaih minute 85-naah Villa in sawisel rual lohin goal an thun ta nge nge. Liverpool tlarhnung chetsual vangin Jhon Durán chuan ball a dawng a, box pawn atangin lei hrulah fuh zeta pet goal zuiin an si phurh a sut.
Minute 85-naa an goal thun hian a fuih phur zui viau a, an mahni tantute thawm ring takin an mikhual Reds a tibuai tel bawk. Point hmuh ngei tuma tan khawh an ni bawk a, an mamawh point thawkchhuak turin goal an thun leh ta nge nge. An si phurh sut thenna goal a thun atanga minute thum hnu lekah goal an thun zui leh nghal zat. Fuh zeta an khingpuite an nawr laiin Jhon Durán chuan Liverpool si nghak Alisson Becker inrin hmain a pet thut a, goal ruakah awlsam taka pet goal in an si phurh a sut zo ta nge nge.
Goal thum ve ve an thun hnuin inkhel a hmuhnawm zui viau a, Villa hian chak ngei tumin tan an khawh zui nasa hle. An mualah chak ngei tum mah se Liverpool lakah goal an thun belh thei tawh lo. Goal thun belh thei tawh lo mah se, point hmu tura tlawm an pumpelh theih vangin Villa tan hian result tha tak a ni tho thung.
Liverpool lakah tlawm an pumpelh vangin Aston Villa hian champions league an hnaih leh zual. Khelh khat khelh hmabak la nei chungin point 68 an hmu mek. An hnuai chiaha awm Tottenham nen point ngain an inthlau mek a. Tottenham aiin vawi khatin an khel tlem zawk thung. Tottenham hian thawhleh zan khan champion tuma chak ngei tum Manchester City an mikhual a, Manchester City hi an hneh lo a nih chuan an tan Aston Villa umphak theih a ni tawh dawn lo. Tottenham hian City hi lo hneh tehreng pawh ni se Villa hian an match hnuhnung berah Crystal Palace laka point an hmu a nih chuan hun rei tak hnuah champions league khel turin an tling chiang tho dawn thung. Tottenham leh City result hi an ngaihven hle ang.
Anton Villa in UCL an hnaih
![](https://theaizawlpost.org/wp-content/uploads/Clipboard01-962.jpg)