Apache helicopter dawng tan dawn

Apache helicopter dawng tan dawn

Apache helicopter dawng tan dawn
India chuan United States atangin AH-64E Apache attack helicopter a lei tura a hmasa berte chu Thawhtanni hian a dawng tawh dawn a, Indian Army tihchangtlunna kawnga pawimawh tak tling tura ngaih a ni.
Helicopter-te hi Indian Air Force Hindon Air Force Station-ah tumpui tur an ni a, hemi hnuah hian Pakistan nena inrina bawr, a bikin Jodhpur bula desert sector, March, 2024-a sipaiten Apache squadron an neih hmasak berte hmunah chhawp an ni ang.
Apache helicopter-te hi hmelma beihna kawnga tangkai leh kawng hrang hranga hman theih tura ngaih a ni a, indona muala van sang atanga hnaih taka sipai dangte thlawpna atana tangkai tur a ni.
‘Vansang tank’ tia an sawi mai thin, AH-64E Apache hian mi a phurh theih bakah rang takin missile a kap chhuak thei a, rocket tha chi leh missile sin chi phuh chhuak thei a ni.
30 mm chain gun-a thuam niin hei hian silaimu 1,200 a keng tel a, hmelmain an beihna leh an awm hnai em tih hmuh theihna radar, a hnung, hma leh sir zawng zawng en vek thei a pai a. Zan khaw thim hnuaiah pawh awlsam taka thil hmuh theihna belin a bitum a hlah lohna tura thuam a ni bawk.
Tun lai khawvela helicopter changkang bera ngaih, Apache hi Indian Army-in a neih chuan a tum tak kah fuh theihna leh indona kawng hrang hrang an thawhpui dangte nena tanhonaah a pui dawn a ni.
India kuta hlan hmasak ber tur hi pathum an ni dawn a, a dang pathum pawh kumin kum tawpah hlan hman beisei a ni a. US hnen atanga ralthuam leina tur hian kum 2020-a President Donald Trump-a’n India a lo tlawh tum khan $ maktaduai 600 hu zet inremna an siam a ni.
Indian Airforce hian tunah hian Dhruv, Rudra leh Light Combat Helicopter (LCH) a hmang mek a ni.

Comments (0)
Add Comment