Sawrkar kum liam ta, 2023- 2024 khan Mizoram Cooperative Bank Ltd. chu an hnena sum dahluh nuai 150757.54 dawngin, loan cheng nuai 117212.84 a pechhuak a. Hemi hun chhunga an credit deposit ratio (CDR) chu 77.75 niin, Mizorama bank inbun zingah kum kalta chhung hian a tha ber a ni.
Apex Bank chairman Lalnunsanga chuan an bank chu Mizo mipui ta, a hlawkna pawh Mizo mipui tel a ni, tia sawiin, an bank kaltlanga sum chevel reng reng Mizoram pawnah chhuak loin, state chhungah vek a virkual a, an hlutna chu mipuiin hre thar zel se an duh tih a sawi. Bank ringawt chu hma an lakna a ni lo tih sawiin, thingtlanga cheng, bank awm lohnaah mipuiin hma an sawn theih nan Primary Agriculture Credit Cooperative Society (PACS) an kalpui a, hei hi thingtlang khaw tam takin an chhawr tangkai mek tih a sawi a ni.
Apex Bank hian sawrkar kum liamta chhung khan hlep cheng nuai 4246.47 an nei a. Tunah Mizoram hmun hrang hrangah branch 28, ATM booth 34 leh mobile ATM 2 a nei a. Kumin chhungin branch thar 8 hawn tumin an inruahman. Board of Director term kal mek, kum 5 chhungin branch 50 neih tlin tumin hma an la a ni.
Hmun hrang hrang atangin bank hawn dilna an dawng nasa a, branch pakhat hawng turin cheng nuai 25 vel sen bakah thawktu 3/4 tal dah nghal a ngaih avangin dilna an dawn reng reng uluk takin an zirchiang a, mipui awm zat, sum chetvel dan leh sawrkar department awm dante zirchiangin thutlukna siam thin a ni a. Kum 3 chhunga hlep nei hman turin ruahman a ni thin tih an sawi bawk.
APEX Bank hian Ningani khan MJA MJA Public Libary tan computer full set a pe a. MJA Public Libary Sub-Committee chairman, MJA Gen. Hqrs. vice president C Lalhmachhuana chuan Apex Bank-in duhsak taka MJA tan computer a pe chu an lawm hle tih a sawi a. Tunhma atanga Apex Bank leh MJA-in thawh hona tha tak an neih chu chhunzawm zel an duh tih a sawi.
Apex Bank CD ratio 77.75% Mizoram bank-ah a sang ber
