Apex Bank-in lawmman dawn lawm
National Federation of State Cooperative Banks (NAFSCOB) Diamond Jubilee lawmna New Delhi-a neiha Mizoram Cooperative Apex Bank Ltd-in ‘Annual Performance Award For Best Performing State Cooperative Bank II-Tier Structure 2023- 2024’ an dawn chu Thawhlehni khan an lawm.
Lawmna hmanpuitu Cooperation minister PC Vanlalruata chuan APEX Bank-in cooperative bank titha chawimawina a dawng thei chu Mizoram state ang pawha inchhuanna tham nia a hriat thu a sawi a. Cooperative dinhmun chuan Mizoram ei leh bar thlengin a nghawng tih sawiin, “Sawrkar chu bank-te nena tanghoa mipui tana thawk tur a ni a, mipui tana rawngbawlna thinlung pua thawhhopui turin bank-te ka ngen a ni,” a ti.
Mizoram Cooperative Apex Bank hi 1982 July 31 khan Mizoram sawrkarin a din a. Apex bank hnuaiah hian tunah thawktu 300 chuang awmin, branch 30 leh ATM 38 vel a enkawl mek. India rama 2 Tier State Cooperative Banks zinga tehfung hrang hranga titha ber hi a kum zawnin, 2022- 2023 leh 2023- 2024-ah a lo dawng tawh a. Tun tuma lawmman hi November 26 khan NAFSCOB Golden Jubilee lawmnaah Union Cooperation minister Amit Shah chuan a hlan a ni.
Tunah Apex Bank hian deposit cheng vaibelchhe 1539.2 a dawn atangin loan cheng vaibelchhe 1206.1 a pe chhuak a, deposit an dawn atanga loan an pek chhuah tehfung (CD Ratio) chu 78.8% niin, Mizorama bank zingah sum dawn atanga teha loan pe chhuak tha ber an ni mek.
Apex Bank-in lawmman dawn lawm
