April-ah Hnahthial by-pass
road siam zawh hman tum
Hnahthial by-pass road siam mek chu Ningani khan district bawrhsap K Vanlalruati hoin endik a ni a. A kaihhnawih sawrkar aiawhte, kawng sial hna thawktu Mathiyan Construction Pvt Ltd, ABCI, NHIDCL bakah YMA leh MJA aiawhte an tel. Tun April thla chhung hian zawhfel hman an tum tih contractor-te hian an lo sawi a ni.
Mathiyan Construction Pvt Ltd aiawhte chuan Aizawl kawng atanga kal a, Hnahthial by-pass road luh tawntirh kawng chhak chu breast wall-a dawl a ni dawn a, a sak hna hi ni 15 hnua tan tur a ni a. Chumi hma chuan breast wall bul by-pass kawng chu peihfel vek a ni dawn tih an sawi a ni.
By-pass kawng atanga Denglung pen luhna kawng chu duhthu a sam lo nia thu dawn a nih avangin bawrhsap ho hian endik a ni a. Contractor lam chuan by-pass road siam hna an zawh hnuah Denlung pen luhna hi luh a nawm zawk theihnan an siamtha dawn tih an sawi.
By-pass chhaka NH-54 kawng tla bal, dawlthat hna thawh mek chu endik niin, RCC retaining wall siam hna bik zawh a ni tawh a. Retaining wall hi metre 7 vela sang nia sawi a ni. NH-54 kawngpui an a la thlen phak lohna chu leia dawla, thing to theihna tura siam (seeding and mulching) tum a ni.
Bawrhsap chuan kawng tla bal lai chu zauh a, retaining wall pawh kawngpui an thlenga dawl chhoh ni thei se a duh tih a sawi a ni.
Tun dinhmunah by-pass road black top loh chu belhkhawmin metre 700vel a la awm a. A bak chu black top tawh niin, layer tawpna (Bituminous concrete) phah chauh an hmabak tawh. By-pass road thui zawng hian km.7 tling lo hret a ni.
Contractor lam chuan an hna a chak loh chhan pakhat chu, kawngpui siamna hmanrua (raw materials) duhthusama tam a awm loh vang niin an sawi a. Kawngpui siamna tur rora hi Haulawng road atanga an lak deuh vek a ni. Tunah thawktu 70 vel an nei.
NHIDCL hnuaiah Mathiyan hian by-pass road hnathawh hi changin, NH-54 hi ABCI-in a chang thung a. By-pass kawng hi siam zawh a nih hnuah Mathiyan Construction Pvt Ltd hian kum 4 chhung an enkawl ang.
April-ah Hnahthial by-pass road siam zawh hman tum
