Assam Rifles ram chhuahsan hman zui dan tur ngaihtuahtu Advisory Committee chuan Assam Rifles ram chhuahsan hmunah Aizawl Police Station dah rawtna a thuphungin a pawm a. Chhuah lamah kawngpui sial tum a ni a, mipui len khawthawnna hmun zau siam tum a ni a. AR Cinema hall awmna chu parking hmun atan siam rawt a ni a. PHE-in hmun thuma tui dahkhawlna siam an dilna pawh, an siam dan tur design hriatsak hmasak nise an ti a. A ram zawng zawng zatve aia tam (52.57%) chu hmun hring, mipui tana len khawthawn theihna turin ruahman a ni bawk.
Advisory Committee-ah hian political party leh pawl hrang hrang aiawh an tel a, chuvangin, Advisory Committee thuchhuak hi chu mipui thuchhuak tih theih a ni dawn a ni.
Thil dang pawh remchang leh tangkai tam tak ngaihtuahnaah a awm ngei ang; a pawimawh hmasa erawh Kawngpui bawk hi a ni lo thei lo. Chhuah lama kawngpui sial tumna a awm hi thil tha tak a ni; chutih rualin, tuna Dawrpui leh Treasury inkar kawngpui lun ber mai tihzauh dan tur ruahmanna a ri ring viau lo erawhin rilru a kap deuh awm e. Helai phei hi four lane (a laiah separator awm)-a siam hi tihmakmawh niin a lang. Aizawl khawpui chhung khawilai mai pawh a chep em em vek a, han tihzauh hleihtheih pawh a ni tawh lo a. Tunah hian khawpui chhung laili, lirthei insulpela tlan tamna ber lai hi thawl deuh hek hawka siam theihna ‘chance’ a inhawng ta a ni a, he remchanna hi kan lei vat a pawimawh dawn niin a lang.
Thil pawimawh em em chu, tunhmaa Plan mumal awm loh avanga khawpuiin kan tawrh thinna chhan lian ber ‘drainage system’ mawlh mai hi a ni. Tuna AR ram chhuahsan tur hmuna infrastructure thar din belh a nih hma hian, tuiluankawr map hi felfai taka ruahman a pawimawh dawn. Tunah chuan duhtawkin drainage master Plan hi siam theih a nih hmel a, hei hi chu ngaihpawimawh hmasak bera neih chi a ni. Sawi duah a ngai lo, khawpui chhunga leimin te, lei tlahniam te, chu’ng avanga chenna in tlusawp tawh zozaite hi... Tuiluankawr mumal loh vang a ni tih kan sawi sup sup thin hi!
