State kan nih phat atanga buaipui Assam Rifles sawnchhuahna tur chu kum 37 zet a ral hnuah, MoU ziah fel a ni ta a; AR insawnchhuahna tura hmalaknaah bung thar a inkeu ta tiin a sawi theih awm e.
MNF leh Congress sawrkarte khan theih ang angin hma an lo la thin a, tuna MoU pawh hi bul lo tantute hmalakna kal zel, ZPM sawrkarin a hmawrbawkna hun a rawn chang, a tih theih. Kum 37 zet a awh dan atang hian, sipai awmhmun hi khawih chet mai mai a harzia a lang chiang awm e.
MoU hi duhthusam ang diak diak chu a ni hauh lovang; mipui duh danah chuan sipai hi Zokhawsangah hian insawn fai phiar se kan duh a ni maithei, mahse chu chu a theih rih si loh a, lungawi rih phawt a tul a ni ber.
Thuthlung ang chuan, MoU ziah atanga thla thum chhungin Assam Rifles hian an in leh lo (Land & Buldings) Chite Lui (Dhobi Nallah) 62.8 acres, Church Area leh Assam Rifles Church 0.6 acres leh Babutlanga ram leh bungrua 0.453 acres te hi Mizoram sorkar hnenah an hlan ang a. April 2025 ral hmain Lammual leh a chheh vel ram 25.94 acres, Land & Building 1.1 acres-a zau, Loch House, Quarter Guard Hill Complex 14.5 acres, School area 1.00 acres leh War Memorial & Mandir 0.78 acres te hi Mizoram sorkar kutah an hlan bawk ang. Tuna an la thutchilh tur HQ 23 Sector, Mizoram Range 95.88 acres, Khatla leh DIG Residence 0.850 acres, Raj Bhavan Complex sira ram hi a zau zawng belhkhawm chu acres 96.73 a ni a, an chhuahsan tur hi acres 107.173-a zau a ni thung.
Tunah chuan a titu ber emaw, a thawh hlawk ber emaw nih inchuha hmanhlel hman kan ni ta lo; AR chhuahsan ram hman tangkai dan tur lamah kan insawrbing a ngai. AR ram chhunga ram lo nei, LSC surrender tawh an awm laiin, a la surrender ve lote pawh an awm kha; khangte pawh kha bawhzui a pawimawh dawn.
AR insawnchhuahna MoU
