AR luah chhuahsan tak
hman dan reltu tur din
Aizawl khawpuia Assam Rifles-in ram a luah thin, a chhuahsan tak hman tangkai zui dan ngaihtuah tur Committee sawrkarin a din.
General Administration Department chuan hriattirna tichhuakin, The Mizoram (Restriction on use of Transferred Land) Act 2002 tlawhchhanin Aizawl lailia Assam Rifles luah thin ram hman tangkai dan tur ngaihtuahtu Advisory Committee din a ni a, chief minister chu chairman niin, vice chairman-ah Home minister K Sapdanga a ni. Member-ah Land Revenue & Settlement minister B Lalchhanzova, Sports & Youth Services minister Lalnghinglova Hmar, adviser to chief minister (Political) Lalmuanpuia Punte, MLA bakah a kaihhnawih department – Revenue, UD&PA, principal chief conservator of Forest, Aizawl Municipal commissioner, PWD/PHE/P&E engineer in chief theuh, GAD additional/joint/deputy secretary-te, Aizawl bawrhsap, Revenue leh UD&PA director, Town & Contry Planning-a chief town planner, MIRSAC principal scientist an ni.
Tlawmngai pawl atangin Central YMA, MHIP, MUP, MZP, MSU bakah environment humhalh lama thawktu Center for Economic and Social Justice (CESJ) leh Association for Environmental Preservation (ASEP) aiawh; political party atangin MNF, Congress leh BJP aiawh leh FLAM (Former Legislators’ Association of Mizoram) aiawh chu member-ah hian an tel bawk.
Mizoram sawrkar leh Assam Rifles-in Aizawl khawpui chhunga ram luah inhlanchhawng chungchanga inremna thuthlung an siamah, heng ram hi sawrkarin mipui vantlang mamawh atan chauh a hmang tur a ni, tih ziah tel a ni.
AR luah chhuahsan tak hman dan reltu tur din
