Arsenal an chak awlsam

Pathianni zan khan London Hmar veng derby khelh a ni a, inkhel ngaihven hlawh takah Arsenal in an mikhual Tottenham Hotspurs chu 4-1 in an hneh a, an elpui lian lakah awlsam takin hnehna an chang. Pathianni zana inkhel dangah Aston Villa in hnehna an chang ve bawk.
Gunners tan Eze a vul
Emirates Stadium-ah Arsenal in an mikhual Tottenham an ngam viau a. An player pawimawh Matin Odegaar, Gabriel Magalhães leh Viktor Gyokeres te awm lo mah se nipui bazar laia an lak luh Eberechi Eze a vul viau a, hattrick siamin Gunners a chakpui.
Chelsea nen an inkar tizau leh zual tura chak mamawh Arsenal hian goal thun ngei tumin Tottenham an nawr nghal. Hma takah goal thun theihna hun tha nei mah se uiawm takin an chhawr tangkai zo lo. Game thunun zawk ni reng Gunners hi Tottenham tan dan reng theih an ni lo. Mikel Merino ball pek fing leh fuh zet atangin Leandro Trossard chuan minute 36-naah hmahruaina goal a thun.
Goal an thun hnuin Arsenal an khel tha leh zual a, goal pawh an thun belh leh thuai. mawi taka ball an inpek kual hnuin Eberechi Eze chuan a tawp a khar tha a, minute 41-naah an goal hnihna a thun. Eze goal thun hnu hian chawlhlawk hmain goal dang a luh belh thei tawh lova, Arsenal in 2-0 a hmahruai chungin chawlhlawk an hmang.
Arsenal khelh that a kal tluang a, chawlhlawk hnu lamah goal an thun belh leh thuai. Second half tan tirhteah an khingpuite an nawr tlang nghal a. Minute 46-naah Eze chuan lei hrulah fuh zetin a pet goal a, an goal hnihna a thun. An elpui lian Tottenham lakah 3-0 ngawta hma an hruai vangin Arsenal an thlamuang viau tawh a, chak chiang tluka ngaih theih an ni tawh.
Si thum faia hma an hruai laiin Arsenal an chesual. Martin Zubimendi tihsual vangin Tottenham in ball an chang. Forward Richarlison chuan Gunners si nghal David Raya awma a fuh lo tih a hmu a, fing leh fuh taka pet goal in minute 55-naah an si phurh a sut. An si phurh an sut vangin Spurs an phur thar a, inkhel boruak pawh a nung thar leh zual.
An chetsual zeuh vangin Arsenal in tan an khawh thar leh. Goal thun ngei tuma tan khawh zui lehin an khel tha chho leh ta hle. Gunners tan hian goal hnih thuntu Eze chuan minute 76-naah an goal lina a thun leh ta mai a, Tottenham nen an inkar a tizau nawn leh. Eze hian London hmar veng derby a hmachhawn hmasak berah hattrick a siam nghal a, hnuhma tha tak a hnutchhiah.
An mualah an chak vangin Arsenal in an hmahruaina an sawh nghet a, Chelsea nen an inkarah point 6 a tla zep nawn leh. Gunners hian khelh 12 atangin point 29 an hmu a. An hmelma lian Tottenham hian khelh 12 atangin point 18 an hmu a, pakuanaah an awm mek a, Gunners nen an inkar a zua zual zel.