International break a nih hnuin Inrinni zan khan English Premier League 2024-25 khelh chhunzawm a ni a, Vitality Stadium-a lenglut Arsenal chu season thara a vawi khat nan an tlawm. Arsenal an chak loh lai hian Manchester United leh Tottenham in hnehna an chang ve thung.
Bournemouth 2-0 Arsenal
Season tharah tlawm nei lova kal tluang mek Arsenal chu AFC Bournemouth hmachhawn turin Vitality Stadium-ah an lenglut a. An len luhna mualah khel chhia lutuk lo mah se minute 30-na lekah defender pawimawh William Saliba hnawhchhuah a nih vangin ngai an awh zo lova, si hnih fai ngawtin Brounemouth lakah an tlawm zui ta hial a ni.
Hmahruaitu thar ni tura chak mamawh Arsenal hian mualneitu Bournemouth hneh tum viau mah se minute 30-na lekah an tlarhnung ban rinawm William Saliba chuan Evanilson a pawhtluk vangin hnawhchhuah a ni. Saliba hnawhchhuah anih vangin manager Mikel Arteta chuan forward Raheem Sterling a lachhuak a, defender Jakub Kiwior a luh tir. Sterling a chhuah hnuin Arsenal tlarhma a bil viau tawh a, an khingpui lakah hlauhawm an siam hlei thei meuh tawh lo.
An mualah tam zawk ni chunga inlan Bournemout hian chak ngei tumin tan an khawh a, hun tawp dawn hnaih lamah an vannei. Minute 70-naah Ryan Christie chuan mualneitu team hmahruaina goal a thun. Goal an chhuah hnuin Arsenal an buai leh zual a, goal an chhuah belh leh thuai. Defender Jakub Kiwior ball pek fuh tawk loh vangin si nghak David Raya chuan Bournemouth player manto ber Evanilson a ti tlu a, penalty a chawi. He penalty hi Justin Kluivert chuan minute 79-naah awlsam takin a pet goal a, an goal hnihna a thun. Kluivert goal thun hnu hian goal dang a luh belh thei tawh lova, AFC Bournemouth chuan team lian Arsenal hnehin point thum hlu tak an hmu.
An mualah United an chak
Season kal meka khel tha tluang tak Arsenal an tlawm laiin season bul tan tha lo Manchester United chuan an mikhual Brentford an lehthal a, hnehna an chang ve thung.
Ban mai tura ngaih Erik ten Hag hnuaia inlan United hian an mualah bul an tan tha lova, goal chhuah hmasa zawkah an tang. Chawlhlawk dawn hnaih minute 45+5-ah Ethan Pinnock chuan hmahruaina goal a thun a, Brentford in si khat faia hmahruai chungin chawlhlawk an hmang.
Chawlhlawk hmain goal thun thei lo mah se chawlhlawk hnu lamah United in bul an tan tha viau thung. Second half tan atanga minute hnihna lekah Alejandro Garnacho chuan goal thunin an si phurh a sut a. Minute 62-naah Rasmus Højlund chuan hma an hruai letna goal a thun a. Denmark forward Rasmus Højlund goal thun hi chakpuiin an mualah point thum an hmu zui ta a ni. United hian khelh 8 atangin point 11 chauh an la hmu a, 11-naah awmin table laihawl an la luah phak rih lo.
Result dang
Inrinni zana inkhel dangah Tottenham Hotspurs chuan an mikhual West Ham United lakah si an phur hmasa zet a, an mikhualte hi 4-1 ngawtin an hneh let thung.
Tottenham muala leng lut West Ham tan hian Mohammed Kudus chuan minute 18-na lekah goal a thun a, mikhual an nihna mualah bul an tan tha hle. Hma takah goal chhuah mah se Tottenham in an khingpuite an chhang let thuai a, Dejan Kulusevski chuan chawlhlawk hmain an si phurh a sut. Spurs tan hian Yves Bissouma leh Son Heung-Min ten goal an thun belh a. Hammers player Alphonse Areola chuan an lamah a ti-goal bawk.
Season thara bul tan tha Aston Villa pawhin an khingpui Fulham an lehthal a, point thum an hmuh belh bawk. Fulham hian an mikhual Villa lakah bul an tan tha viau a, inkhel tan atanga minute ngana lekah Raúl Jiménez goal thun hmangin hma an hruai nghal. Hma takah goal chhuah mah se Aston Villa tan hian Morgan Rogers chuan minute 9-naah goal thunin an si phurh a sut a. Minute 59-naah Ollie Watkins-a’n hma an hruai letna goal a thun hnuin Fulham player Issa Diop chuan minute 69-naah an lamah a ti-goal a, Villa goal thumna a thunsak bawk. Aston Villa hian khelh riat atangin point 17 an hmu a, palinaah awm mekin, an chung chiaha awm Arsenal nen an point hmuh a inzat nghe nghe a ni.
Arsenal an chak lo, United an chak
