Arsenal an chak phawt

January 14, Nilai zan khan zan khan English Carabao Cup semi-final thawhkhatna khelh chhunzawm a ni a, Arsenal chuan mikhual an nihna hmun Stamford Bridge-ah 3-2 in hnehna an chang. Trophy lak chaka tuihal Arsenal hi semi-final thawhkhatnaah an chak phawt a. An mualah inrintawkna sang zawk nen an inlan zui ang.
Semi-final-ah London club lian pahnih; Chelsea leh Arsenal te inkhel tur hian ngaihven a hlawh hle. Arsenal hian Stamford Bridge-a inkhel an hmachhawn hnuhnung berah tam zawk ni chungin hnehna an lo chang zo lo tawh a, Carabao Cup-ah erawh hnehna chan ngei tumin tan an khawh a, an phu ang ngeiin hnehna an chang ta ngei bawk.
Arsenal hian Chelsea lakah bul an tan tha viau a, inkhel tan atanga minute 7-na lekah defender Ben White chuan Declan Rice siamsak atangin hmahruaina goal a thun nghal. Hma taka goal an thun vangin an phur a, an elpui lian lakah inrintawkna sang zawk nen an inlan. Khelh tha zui viau mah se Gunners hian chawlhlawk hmain goal an thun belh thei lova, Blues pawhin an si phurh an sut thei bik lo bawk.
Chawlhlawk hnu lamah inkhel a hmuhnawm leh zual a, goal li ngawt a luh belh. Arsenal tan hian Viktor Gyökeres chuan second half tan atanga minute ngana lekah an goal hnihna a thun a, an hmahruaina a tizaau. Goal thun mamawh Gyokeres hian Chelsea laka goal a thun bakah Assist vawi khat a nei bawk a, a tan zan tha tak a ni.
An mualah si hnih an phurh hnuin Chelsea manger thar Rosenior chuan player a thlak danglam a, Manchester United atanga an hawh mek Alejandro Garnacho a luhtir. Argentina forward Garnacho hian minute 57-naah goal thunin an si phurh a sut then. Garnacho goal hian Blues tiphur viau mah se an phur rei lo. Arsenal midfielder Martín Zubimendi chuan minute 71-naah an goal thumna a thun a, an hmahruaina a tizau nawn leh. 3-1 a hma an hruai vangin Arsenal dinhmun a tha viau tawh.
Dinhmun chhe takah ding bawk mah se Chelsea an hnual mai lova, huai takin an mikhualte an nawr let. Hun tawp dawn hnaih minute 83-naah an goal khatna thuntu Alejandro Garnacho chuan an goal hnihna a thun zui leh a, an inkar an tizim nawn leh. An inkar a zim nawn leh vangin Chelsea an phur a, an mualah tlawm tumpelh tumin tan an khawh nasa hle. Tlawm hreh viau mah se an si phurh an sut thei tawh lova, Arsenal lakah an tlawm ta nge nge a ni.
Mikhual an nihna hmunah hnehna an chan vangin Arsenal in final an hnaih leh zual a. Emirates Stadium-ah tlawm pumpelh ngei tumin tan an khawh zui ang.