Manchester City tlawm hnua inlan Arsenal in Nottingham Forrest lakah hnehna an chang zo lova, point 9-a hmahruai fal theihna hun tha an neih an chhawr tangkai thei lo. Arsenal rual hian champion lai Liverpool pawhin hnehna an chang zo bik lo ve bawk.
Champion chaka tuihal Arsenal hi Roobinhood-a te khua Nottingham Forrest hmachhawn turin City Ground-ah an lenglut. An len luhna mualah an khel chhe hran lova, goal thun theihna hun tha an neih chu vanduaithlak takin an chhawr tangkai lo zo. Gunners tan hian defender Gabriel Mangalheas, Gabriel Martinelli leh Bukayo Saka ten uiawm takin an hun tha neih an hlah a. Penalty hmuh ngei turah inngai bawk mah se pek an ni lo tehtlat bawk. Nottingham Forrest pawhin an hun tha neih an chhawr tangkai zo bik lova, table chung ber luahtu Arsenal nen goal awm lovin an inhnehtawk a, an mualah point khat hlu tak an hmu.
United lakah pahnihnaa awm mek Manchester City an tlawm vangin Arsenal hian point 9 a san fal theihna hun tha an nei. Nottingham Forrest hneh se point 9 in an sang fal ang a, champion an hnaih leh zual sawt dawn. An tum leh duh ber point thum hmu zo bik lo mah se Arsenal hian City nen an inkar chu point khatin an tihzau belh hret tho thung.
Season kal meka chetha tak arsenal hian an game hnuhnung pahnihah hnehna an chang zo lova, Liverpool leh Nottingham Forrest lakah goal an thun thei lo ve ve. Point 6 hmuh theihna atanga point hnih chauh an hmuin Gunners tan uiawm tak mai a ni a. An champion zo lo leh a nih ngat phei chuan an point hloh zawn hi an la ui deuh deuh ngei ang. Game hnih chhung chak zo lo zawn tawh Arsenal hian Manchester United an hmachhawn zui leh dawn a, point thum hmu turin hna hautak tak an thawh ngei a ngai tura ngaih a ni.
Liverpool an chak zo bik lo
Champion lai Liverpool an khel tha tluang thei tak tak lova, Anfield-a an mikhual Burnley nen 1-1 in an inhnehtawk. Chak an harsat thin vangin Liverpool hian hmahruaitu Arsenal chu point 14 ngawtin an phak lo mek.
Liverpool hian chawlhlawk hmain goal hnih thun theihna hun tha an nei. Penalty an hmuh chu Dominik Szoboszlai chuan goal post pet perin a thelh. Penalty an thelh hnuin Florian Wirtz chuan minute 42-naah hmahruaina goal a thun ta tho a, 1-0 a hmahruai chungin chawlhlawk an hmang.
Chawlhlawk hnu lamah mikhual team Burnley an khel tha a, goal thunin an si phurh an sut. Burnley si phurh sutna goal hi minute 65-naah Marcus Edwards thun a ni. 1-1 a ni hnuin inkhel a hmuhnawm zui viau naa goal erawh a luh belh thei tawh lo thung a, an inhnehtawk zui ta a ni.
Manchester United hian Reuben Amorim hnuaiah hma an sawn hleithei lova, an indawh ngar ngar hnuin an inban ta nge nge. Manager lailawk ni tura Michael Carrick an lak luh hmain Darrent Fletcher an ruai zuai a, Fletcher hnuaiah vawi hnih an tlawm zawn leh tlat thung. League Cup atangin an tla tawh a, FA Cup atangin an tla tawh bawk. EPL-ah khelh 21 atangin point 32 chauh an la hmu a, hmahruaitu Arsenal nen point 17 zetin an inthlau tawh a, an champion zawh a rinawm tawh lo viau. Carrick hnuaia United in a tum san ber tur chu season thara champions league khelh phak a ni deuh tawh mai hmel.
United leh City hi EPL a an intum hnuhnung ber chu September 14, 2025 kha a ni a. Etihad Stadium-ah an inhmachhawn a, United hi 3-0 ngawtin tlawm zawkah an tang. Etihad Stadium-a an tlawmna chhanletiin Old Trafford-ah hnehna chan ngei tumin tan an khawh ang. United hian inelna hrang hrangah City hi vawi 80 ngawt an lo hneh tawh thung.
Arsenal an chak zo lo
