Arsenal champion beiseina a chuai

April 21, Zirtawp zan khan English Premier League hmahruaitu Arsenal chu Emirates Stadium-a an mikhual Southampton nen 3-3 in an inhnehtawk. An hmahruaina tizau tura chak an mawh em mem laia table mawngphaha awm Saints lakah an hnehna an chan zawh leh tak loh vangin Arsenal in champion an beiseina a chuai ta hle a. Khelh thum chhung ngawt hnehna chang thei lo zawn tawh Gunners hian ‘Next season’ an thlir a ngai leh nge nge dawn a nih hmel.
Laipui puah khalh tu Saints
Table mawngphah awm mek Southampton tan hmahruaitu Arsenal hmachhawn hi thil chakawm loh tak mai a ni a. Emirates Stadium-a inkhel tur an nih vangin dinhmun chhe leh zualah an din phah ngei dawn niin a ngaih lawk theih deuh ruak. Mah se, hun a tawp meuh chuan chak phu zawk Southampton chuan uiawm takin point hnih an hloh a, Arsenal in point khat an hmu ve ta hram chauh zawk.
Tlakhniam pumpelh tuma tan khawh Southampton hian laipui puah khalh turin bul an tan tha a, an vannei tel bawk. Inkhel an tan fel awrh chauh tihah Arsenal si nghak Aaron Ramsdale chu ho zetin a chesual. Ramsdale ball pek sual nangchintu Carlos Alcaraz chuan minute khatnaah awlsam takin a pet goal a, hmahruaina goal a thun.
Hma takah goal an chhuah vangin Arsenal an hawihai hle a, minute 14-na lekah an hawihai nawn leh. An si phurh sut tuma tan khawh Arsenal hi Southampton in an nawr let thut a. Fing taka ball an inpek kual hnuin Arsenal forward hlui Theo Walvott chuan minute 14-naah chiang zetin a pet goal a, an goal hnihna thunin a team hlui a tihrilhhai leh zual.
Table mawngphah lakah si hnih ngawt an phurh hnuin Arsenal in an si phurh sut tumin thapui an thawh a, an mikhualte an nawr tawm ta hle. Minute 20-naah Gabriel Martinelli chuan goal a thun ta nge nge a, an si phurh a sut then. Gunners hian goal thun theihna hun tha dang nei bawk mah se chawlhlawk hmangin an si phurh an sut zo thei lova, hnufual zawk ni chungin chawlhlawk an hmang.
Chawlhlawk hnulamah pawh chak mamawh Arsenal an insiamtha hleithei chuang lo. Rin phak bakin Southampton an khel tha chhunzawm a, goal thun hmasa zawkah an tang leh ta hial. Minute 66-naah Caleta-Car chuan hnaite atanga tauh goal in an goal thumna a thun a. Hmahruaitu Arsenal hnehin, point thum an hlawhchhuah a rinawm ta hle.
Mikel Arteta team Arsenal hian an si phurh sut tumin tan khawh viau mah se an goal venhim tuma tan khawh Southampton an su tlang hleithei meuh lo. Hun tawp dawn tep minute 88-naah captain Martin Ødegaard chuan beiseina thar an neih theihnan goal a thun a, an si phurh a sut then.
Captain Odegaard goal thun hian tlawm pumpelh ram tum Arsenal a fuih phur a, goal an thn belh leh thuai. Minute 90-naah Bukayo Saka chuan box chhung atangin a pet goal a, an si phurh a sut zo ta nge nge. 3-3 a nih hnuin chak ngei tumin Arsenal in tan an khawh zui a. Emirates Stadium-a mipui sing telin fuih phur tha viau mah se goal dang an thun belh thei lova, chak an mamawh em em laiin an chak zo lova, point hnih an hloh leh ta nge nge.
Season kal meka khel tha tluang tak Arsenal hi season tawp dawn hnaih, champion tura chak a pawimawh vanglai takin an talbuai a, chak an harsat ta tlat a, an khelh hnuhnung pathumah hnehna an chang thei lo zawn ta hial. Chak an harsat tak tlat vangin an hmahruaina a pan hle tawh. An hnuai chiaha awm City nen an inkarah point nga tla zep mek bawk mahse City ai hian vawi hnihin an khel tam zawk a. City nen hian Etihad Stadium-a inhmachhawn leh tur an ni bawk nen an chetha thut a nih lem loh chuan City hian an lehpel ngei tura ngaih a ni. Tarlan tawh angin Arsenal hian Emirates Stadium-a an ngam loh City hi nilai zan hian Etihad Stadium-ah an leng lut dawn a, EPL final ang tluk zeta pawimawhah hian an tlawm a nih chuan champion an beiseina a tawp fel ang hialin a ngaih theih ang.
Arsenal lakah tha taka inlanin, point hlawhchhuak hial mah se Southampton hian table mawngphah an luah chhunzawm a. 17-naa awm mek Leicester City nen an inkarah point li chiah a tlak zeh vangin him theih beiseina sang tak erawh an nei thar thung.
Liverpool an chak
EPL 2022-23 hi Inrinni zan khan khelh chhunzawm a ni a. Liverpool chuan Anfield-a an mikhual Nottingham Forrest lakah 3-1 in hnehna an chang a. Champions League khelh phak beiseina Reds hian an chawk nung thar.
An muala inkhel ni mahse Liverpool hian chawlhlawk hmain goal an thun thei bik lova, hei hian an chak zawh loh mai hlauhthawnna nasa tam a siam hman. Chawlhlawk hmain goal lut awm thei lo mah se, chawlhlawk hnu lamah goal nga ngawt a lut ta thung.
Second half tan atanga minute hnihna lekah Diogo Jota chuan Liverpool hmahruaina goal a thun a. Jota goal thun hi minute 51-na lekah Neco Williams chuan a sut zui ve zat. 1-1 a nih hnu lawk minute 55-naah Jota bawkin goal a thun nawn leh a. Hma an hruai nawn lehna hi minute 67-naah Morgan Gibbs-White-a’n sut leh mahse Mohamed Salah chuan minute 70-naah an goal thumna a thun zui leh a, an mualah an chak zui ta a ni.
(51′) Morgan Gibbs-White (67′)champion an tumna kawng daltu pawh Sevilla bawk hi an ni zui leh ta a ni. Red Devils hian Pathianni zan hian FA Cup semi-final an khel zui leh dawn a. Wembley Stadium-ah Brighton an hmachhawn dawn. United manager Erik ten Hag chuan FA Cup final luh ngei an tum thu a sawi a. FA Cup-ah champion pawh nise Sevilla an hneh loh vangin Trophy lian pathum lak kawp an tumna erawh a tlawlh fel ta thung a ni.
Roma in Feyenoord an lehthal
Europa League quarter-final dangah AS Roma chuan Mimuala an hneh loh Feyenoord Rotterdam chu an mualah 4-1 in an lo hneh a, semi-final an lut.
Mourinho enkawl Roma tan si khat phur sa chunga an hmachhawn Feyenoord lakah an chak zo lo teuh hle a. Hun tawp dawn hnaiah Dybala goal ropui hmanga an si phurh sut zo hramin, Extratime-a goal hnih an thun an chakpui thei tawk.
Roma tan hian Leonardo Spinazzola chuan minute 60-naah hmahruaina goal a thun a, an si phurh a sut zo phawt. Si belhkhawmah 1-1 a nih laiin eyenoord in goal an thun hmasa leh a, minute 80-naah Igor Paixão goal hmangin Roma dinhmun a derthawng thar leh. An mualah tlawm thei dinhmunah an din nawn leh hnuin Roma in goal thun ngei tumin thapui an thawh a. Minute 89-naah Paulo Dybala goal ropui hmangin an si phurh an sut ta nge nge.
Hun pangngai tawp thlenga goal dang a luh belh theih loh hnuin minute 30 dang khelh belh leh a ni a. Mualneitu Roma chu tlo zawkah tangin goal hnih an thun belh. Minute 101-naah Stephan El Shaarawy chuan hma an hruai letna goal a thun a. Minute 109-naah Lorenzo Pellegrini chuan an chakna nemnghet turin an goal lina a thun zui leh bawk. Hun tawp thlengin goal dang a luh belh tawh lova, Roma chuan 4-2 a Feyenoord Rotterdam lehthalin semi-final an lut ta a ni.
Juventus leh Leverkusen an tlang
Europa League quarter-final dangah Italian club lian Juventus leh German club Bayer Leverkusen te ten an khingpui ve ve hnehin semi-final an lut bawk.
Serie A club lian Juventus hian an mualah si khat faia an hneh tawh Sporting Lisbon chu Estádio José Alvalade, Lisbon-ah 1-1 in an inhnehtawkpui a. Si belhkhawmah 2-1 in an chak a, Sevilla hmachhawn turin semi-final an lut.
Si khat faia hmahruai tawh Juventus hian Mimualah bul an tan tha viau a, minute 9-na lekah midfielder Adrien Rabiot chuan hmahruaina goal a thun. Si hnih faia hma an hruai tawh vangin an dinhmun a tha viau tawh. Dinhmun chhe takah ding mahse Lisbon in beisena thar an neih theih nan penalty an hmu. Penalty hi minute 20-naah Marcus Edwards-a’n pet goal in an si phurh a sut a. Hun tawp thlenga goal dang an thun belh theih loh vangin Lisbos hi semi-final lut zo lovin an tla zui ta a ni.
Ninga zana inkhel dangah Bayer Leverkusen chuan an mualah 1-1 a an inhnehtawkpui tawh Union St.-Gilloise chu Lotto Park, Brussels-ah 4-1 ngawtin an hneh a, femi-final an lut.
Europa League semi-final hi May ni 12 leh ni 19-ah khelh a ni dawn a. Juventus leh Sevilla an intum ang a. AS Roma leh Leverkusen an inhmachhawn ve bawk a. Champions League-ah Italian club an chetha a. Europa League-ah pawh Serie A club pahnih final lut thei dinhmunah an ding bawk a. Europe lamah an chetha hlawm hle.