Arsenal in Barcelona an hneh

English Premier League club lian Arsenal leh La Liga champion FC Barcelona te chu keini huna ningani zing lam khan SoFi Stadium, California, USA-ah an inkhel a, inkhel hmunnawm takah Arsenal chuan 5-3 in hnehna an chang. Inkhel dangah Chelsea leh New Castle United an inhnehtawk ve thung.
La Liga champion FC Barcelona hian Arsenal lakah bul an tan tha viau a, goal an thun nghal thuai. Inkhel tan atanga minute sarihna lekah Robert Lewandoski chuan hmahruaina goal a thun. Hma takah goal an thun vangin Barca an phur a, inrintawkna sang zawk nen EPL club lian an hmachhawn zui. Hma takah goal chhuah in, hnufual zawkah tang zawn mah se laipui a puak tha a, hnehna an chang let ta tlat thung.
Si an phurh hnuin Arsenal hian na takin an khingpuite an nawr let nghal a, goal pawh an thun thuai. Minute 13-naah an forward pawimawh Bukayo Saka chuan goal thunin an si phurh a sut. An si phurh an sut hnuin Gunners an khel tha zui a, goal thun theihna hun tha an nei zui leh. Hlauhawm zawkah tang hmasa mah se goal thun hmasa zawk chu La Liga champion zawk an ni leh tho thung.
Minute 34-naah Brazil winger Raphinha chuan Barcelona goal hnihna a thun. Barca in hma an hruai nawn leh hnuin Arsenal an hmuhnawm zui teh tlat a, chawlhlawk hmain an si phurh an sut nawn leh. Chawlhlawk dawn hnaih minute 43-naah Chelsea atanga an lak thar Kai Havertz chuan goal thunin an si phurh a sut a, 2-2 a inhnehtak chungin chawlhlawk an hmang.
Arsenal goal hnihna thuntu Germany forward Havertz hian a club thar Arsenal tan a khel tha chho rih viau a, goal hnih a thun der tawh. Barca an hmachhawn tum hian Gunners player manto ber Declan Rice a inlan lo va, Ajax atanga an lak thar Jurrien Timber erawh mit la takin a inlan ve thung.
Chawlhlawk hmaa goal li ngawt a luh hman vangin inkhel hmuhnawm a tling der tawh a. Chawlhlawk hnu lamah goal li bawk lut lehin, entute mit a tlat hle. Chawlhlawk hnu lamah hian Gunners in goal thum an thun laiin Barca in goal khat chauh an thun ve thung a, Mikel Arteta team in inlehthlal na lian an thlentir.
Second half-ah Arsenal an khel tha viau a, goal pawh an thun thuai. Minute 55-naah Leandro Trossard chuan hma an hruai letna goal a thun a. Trossard vek hian minute 78-naah goal a thun belh zui leh a, an hmahruaina a tizau.
Si hniha hnufual zawk an nih hnuin Xavi team Barcelona in goal thun tumin tan an khawh zui a, an che vel a hmuhnawm thei hle. Na taka an khingpuite an nawr an hlawkpui a, Barca hian minue 88-naah Ferran Torres hmanga goal thunin Arsenal nen an inkar an tizim.
An goal thumna an thun vangin La Liga club lian Barcelona phur thar viau mah se an phur rei lo. An goal thumna an lawmna au rawl a reh fel hma hauhin Gunners in goal an thun zui leh nghal zat a, minute 88-naah Fabio Vieira chuan an goal ngana a thun a, an hmahruaina a tizau nawn leh. Vieira goal thun hnu hian goal dang a luh belh tawh lova, Arsenal chuan khingpui hautak FC Barcelona chu 5-3 ngawtin an hneh zui ta a ni.
Ningani zing lama friendly match dangah EPL team lian pahnih; Chelsea leh Newcastle United te chu Mercedes-Benz Stadiumm USA-ah an inhma-chhawn a, 1-1 in an inhnehtawk. He inkhel hmuhnawm takah hian Newcastle tan Nicolas Jackson-a’n hmahruaina goal a thun a. Chelsea tan Miguel Almirón-a’n minute 45+4-ah a sut.