Pathianni zan khan English Premier League 2023-24 khelh chhunzawm a ni a, inkhel ngaihven hlawh takah Arsenal chuan si khat faiin Manchester City an hneh. Inkhel dangah Liverpool an chak zo lova, Newcastle United pawh West Ham United nen an inhnehtawk ve bawk.
Kum sarih hnuah Gunners chakna chu
London club lian Arsenal hian tunhnaiah Manchester City an ngam lo viau a, City nen EPL-a an inkhelh hnuhnung vawi 12 zetah chak lo zawkah an tang vek. EPL-ah bik City an hneh hnuhnun ber tum chu kum 2015-ah daih tawh khan a ni. Season liam ta pawh khan City an ngam loh em vangin an champion theih loh phah tawh bawk. An hneh loh zawn tlut tlut lakah Pathianni zan khan hnehna an chang ve ta nawlh a. Arsenal an phur in, inrintawkna sang zawk a nei thar hluai bawk.
EPL an khelh hnuhnung berah rin loh taka tlawm City hian an hneh than Arsenal lakah bul an tan tha a, inkhel tir lamah an kat kual nasa hle. Ball chang tam zawkah tangin khelmual chanve-ah an dang bet a ni ber. An mualah ball an chan hleih theih loh bakah ball an chan chhunah an inpek dik hleitheih loh vangin Arsenal an buai a, awmze neiin an mikhualte an nawr hleithei meuh lo. Bet zawk an nih reng vangin Arsenal si nghak David Raya hmuh tur a awm reng a. Raya hian a tihsual vangin goal an chhuah teuh hle nghe nghe a. Julian Alvarez a pet per chu vanneihthlak takin goal ruakah a lut lo hlauh a, Gunners an him.
Inkhel a rei a, Arsenal an insiamtha tawlh tawlh. City hian ball chang tam zawk mah se goal Gunners tlarhnung an thiat thei bik chuang lova, hlauhawm an siam tam thei bik lo. Arsenal defender ten City goal thun khawl Erling Haaland an thukru a, awmze nei lovin an siam. Haaland hian hun tawp thlengin shot a nei lo tluan ta hial a, Arsenal lakah hnuhma chhe tak a hnutchhiah.
Hun rei tak chhung goal lut a awm theih loh hnuin Gunners manager Mikel Arteta-an awmze nei takin Substitution a siam a, hliam damkawr Gabriel Martinelli a luhtir. Martinelli bakah hian Thomas Partey leh Kai Havertz ten mual chhung an lut bawk. Bench atanga lut pathumte hian an thawh hlawk hle a, goal an thawkchhuak. Partey ball pek a dawn hnuin Havertz chuan Martinelli tan a chhawpsak a. Martinelli hian Nathan Ake lu a pet per chungin minute 96-naah hmahruaina goal a thun. Hun tawp dawn hnaiha an goal thun hi hun tawp thlengin an venghim a, Manchester City lakah Arsenal an chak ve ta nge nge.
Arsenal in EPL-ah Manchester City an hneh hnuhnun ber tum chu December 2015 daih tawh kha a ni a. Hemi hnu hian EPL-ah vawi 16 zet an intum leh tawh a. Vawi 16 ngawt an chak theih loh zawn hnuin Pathianni zan khan an chak ve ta nawlh a, an harsatna tawh thin an su kiang. Champion lai City an hneh hi Arsenal tan a lawmawm hle a, champion lawm takin an lawm zui ta reng bawk. Gunners manager Mikel Arteta chuan khawvela team tha ber hneh nia a inhriat thu a sawi a. A naute an puitling ve ta a, hnehna chang tura inrintawkna sang zawk an neih tak thu a sawi tel bawk.
Arsenal lakah an tlawm tum hian City in shot vawi li chiah an nei a. Hei hi Pep Guardiola hnuaia shot an neih tlem ber tum a ni. An elpui lian Arsenal lakah an tlawm leh tak vangin City hi season tharah vawi hnih an tlawm tawh a. Khelh 8 atanga point 18 hmuin pathumnaah an tlahniam a. An chungah hian tlawm nei lova kaltluang pahnih; Tottenham leh Arsenal te an awm.
Liverpool an chak zo lo
Pathiannia inkhel dangah Liverpool chuan Amex Stadium-ah Brighton & Hove Albion an hmachhawn a, chawlhlawk hmaa an hmahruaina humhim zo lovin, point thum an hlawhchhuak zo lo.
Brighton hian an mikhual Liverpool lakah bul an tan tha a, minute 20-naah Simon Adingra-an hma-hruaina goal a thun. Hnufual zawk an nih hnuin Reds an khel tha chhunzawm a, chawlhlawk hmain hma an hruai let hman. Minute 40-naah Mohamed Salah chuan goal thunin an si phurh a sut. An si phurh an sut hnu lawkah Liverpool hian penalty an hmu zui leh a, minute 45-naah Salah-an penalty pet goal in, hma an hruai letna goal a thun a. He goal hmang hian hun rei tak chhung hma an hruai.
An mualah hnufual zawka an tan reng hnuin Brighton tan Lewis Dunk chuan minute 78-naah goal thunin an si phurh a sut a. Hun tawp thlenga goal dang luh belh tawh lovin an inhnehtawk zui ta a ni.
Brighton lakah an chak zawh loh vangin Liverpool hian khelh 8 atanga point 17 hmuin, palinaah an awm chhunzawm. Brighton hi season tharah an chetha tluang viau a. Khelh riat atanga point 16 hmuin, paruknaah an awm mek a. An chunga mite nen an inthlau lo hlawm hle.
Pathianni zana inkhel dangah West Ham United
leh an mikhual Newcastle United chu 2 – 2 in an inhnehtawk a. Inkhel dangah Wolves leh an mikhual Aston Villa chu 1-1 in an inhnehtawk ve bawk. Wolves muala point hlawhchhuak Villa hian khelh riat atanga point 16 hmuin, panganaah an awm a, season bul an tan tha hle. Wolves hian point 8 chauh an la hmu a, 14-naah an awm mek thung.
Arsenal in City an hneh
