Pathianni zan khan English Premier League (EPL) ah inkhel ngaihven hlawh tak a awm a, Old Trafford ah hmahruai let leh tura chak ngei ngei mamawh Arsenal an lenglut. Gunners hian an lenluhna mual Old Trafford-ah hnehna an chang a, pointthum hlu tak an hmu. United laka point thum an hmuh hmangin Manchester City an lehpel a, table-ah hma an hruai let leh. Arsenal in champion an hnaih laiin United erawh in european competition an hlat deuh deuh thung a, an dinhmun a inang lo hle.
Season kal meka chak harsat, season chawhnu lamah che chhe leh zual United hi hliamin a tibuai nasa viau a, Arsenal an mikhual tum hian centre defender pangngai Jony Evans chiah chhawr tur an nei. An centre back an inhliam thup vangin Brazil midfielde Casemiro chu manager Erin ten Hag-a’n tlarhnungah a chhawr a ngai. Casemiro-a’n offside thang a kam fuh loh vangin United hian goal an chhuah phah hial nghe nghe a ni.
Old Trafford a lenglut Arsenal hian an tan chak a pawimawhzia an hrechiang a, mualneitu United lakah fimkhur takin an inlan. Tlarhma player nei chhe lo viau mah se manager Mikel Arteta chuan goal chhuah loh pawimawhzia a hrechiang a, ni dang angin an khingpuite an nawr pup pup duh lo. Hmahruaina goal an thun hnu pawhin an fimkhur zui hle a, counter attack-ah an innghat deuh chawt. Bet zawk ni reng mah se Gunners hian goal thun belh theihna hun an nei tha zawk a, si nghak chetha tak Andre Onana-a’n United a chhanhim ngun malh malh hle.
United hian an mikhual Arsenal lakah bul an tan tha a, ball chang tam zawkah an tang. An mikhualte kat kual fo mah se an tlarhma hriam tawk lo an tuar a, Arsenal si nghak David Raya tan fiahna hautak an chhawpsak hleithei meuh lo. Ball chang tam zawk ni bawk mah se United an chesual a, goal chhuah hmasa zawkah an tang.
United si nghak Onana ball petchhuah a fuh tawk lova, Arsenal in ball an chang. Gunners hian fuh zetin an khingpuite an nawr let a, United tlarhnung lamin offside thang an kam fuh tawk lo bawk nen Kai Havertz chuan fuh zetin ball a la lut. Havertz hian Leandro Trossard tan tha zetin a chhawpsak a. Trossard hian minute 20-naah awlsam zetin a pet goal a, hmahruaina goal a thun.
Minute 20-na lekah Trossard goal thun hi Arsenal in an venghim tluan a, United lakah hnehna hlu tak an chang. Gunners hian season kal meka an match hnuhnung berah Everton an mikhual dawn a, an muala an chak a, City in point an hloh bawk chuan an champion ang.
Arsenal in hma an hruai let
