Nipui bazar inhawng mekah player thar lei nan £200m zet seng tawh mah se Arsenal in bazar chhunzawm zel an tum a, Ajax midfielder Moham-med Kudus lak tumin an ngaihven leh mek.
Netherland club lian Ajax chuan an attacking midfielder che tha tak Kudus hi £40million an chhiar. Tunlai midfielder tha zinga tel Kudus manah Gunners pawhin £40million hi sen an hreh lo nia hriat a ni. Kum 22 mi Kudus hi season liam ta khan Ajax tan a chetha viau a, inelna hrang hrangah goal 18 zet a thun bakah assist vawi sarih a nei bawk. An ram Ghana tan pawh a khel chhe lo viau a, World Cup 2022-ah khan goal hnih a thun nghe nghe.
Arsenal hian Kudus hmutai viau mah se bazar nan £200m zet an sen tawh vangin an player neih sa hralh hmasak zet an mamawh dawn thung. Season liam taah uiawm taka champion zo ta lo Gunners hian Chelsea leh Germany forward Kai Havertz an la lut fel tawh a. West Ham leh England midfielder Decland Rice chu British player manto ber ni turin an la lut tawh tawh. Havertz leh Rice bakah hian Netherlands defender Jurrien Timber an dawr fel tawh bawk a, an inlalut zui thuai tura ngaih a ni.
Arsenal chief Edu chuan manager hnenah player dang lak a la duh a nih chuan player an neihsa hralh phawt turin thurawn a pe. Arsenal hian an player paruk vel lai hralh turin an chhawpchhuak mek a, beisei anga hmain an hralh fel thei lo thung. Hralh an tum zingah hian Kieran Tierney, Cedric Soares, Nicolas Pepe, Albert Sambi Lokonga, Nuno Tavares leh Rob Holding te an tel. Declan Rice an neih thar vangin Thomas Partey pawh chhuak ngei tura ngaih a ni bawk.
Kum 26 mi Tierney hi Newcastle United in lak tumin an ngaihven a, Manchester City leh Real Madrid nen sawi zawm an lo ni thuak thuak tawh bawk. Scotland defender Tierney hi £35m ve bawrin hralh theih an inbeisei. Defender Rob Holding hi Besiktas in £2.5m a lak tumin an dawr a, Be-siktas dawrna hi Gunners in an hnar thung. Gunners hian An player man to ber Nicolas Pepe pawh kohkir an tum tawh lo.
Arsenal in Kudus an hmutai
