Arsenal chuan midfielder thar an nei fel ta a, hun rei tak chhung an umzui tawh Marin Zubimendi chu Real Sociedad atangin an la lut a, kum nga daih contract an ziahpui.
Gunners hian tunlaia midfielder tha tak Zubimendi manah a lakchhuah theihna zat £60m an seng. Hetiang zat tho hian La Liga club lian Real Madrid in lak duh bawk mah se Zubimendi hian Arsenal zawm a duh zawk a, Los Blancos a hnar. Liverpool pawhin 2024-a nipui bazar lai khan Zubimendi hi lak an lo tum tawh bawk a, an hlawhtling bik lo. Arsenal hian season tawp hma deuh atang khan lak ngei tumin an ngaihven nghal a, a lakchhuah theihna zata lak an huam miau vangin Real Sociedad tan dan theih an ni lo.
Zubimendi hi mimal inremna an neihpui thuai a, pahnihte pawh an indawr fel thuai bawk. La Liga club hian June thla tawpah law law Zubimendi hralhna man dawn an duh a, Gunners nen July thla an nghak dun. July thla a lo herchhuak a, Liverpool in chhiat an tawk a, an forward Diogo Jota a boral vangin an inlak luh hun tur tihkhawtlai leh hret a ni a. Tunah chuan tih fel ngai zawng zawng tifelin an inla lut fel tawh.
Arsenal midfielder thar Zubimendi hian Real Sociedad tan vawi 236 zet a khel tawh a, goal 10 a thun tawh. Defensive midfielder tha bera ngaih Rodri a awm vangin Spain tan hmun a chang tam thei lo. Rodri hian hliam vanga season khat zet a khelh theih loh vangin Zubimendi hi Spain player pawimawh a ni ta thung. Spain tan hian vawi 19 a khel tawh a, Nations League final-ah Portugal laka an vanduai tum khan a khel tha hle nghe nghe. Arsenal atangin midfielder pahnih; Jorginho leh Thomas Partey te an chhuak a, Zubimendi hian hmun pawimawh tak a chang nghal thei dawn. Muallaiah Declan Rice leh Martin Odegaard te nen an inkawp thei dawn a, Arsenal an hmuhnawm leh zual hle tura ngaih a ni.
Season thum ngawt pahnihna ni zawn tawh Arsenal hian an squad thuamchak hna an thawk mek zel a, Zubimendi an lak hma hian Chelsea atangin si nghak Kepa Arrizabalaga an la lut tawh bawk. An mamawh striker lak ngei tumin tan an khawh mek a, goal thun thei tak Viktor Gyokeres lak tumin hma an la mek a. Gyokeres hi an la thei ta lo a nih pawhin Benjamin Sesko emaw, Ollie Watikins emaw zawk zawk lak ngei an bawk. Heng bakah hian Real Madrid leh Brazil forward Rodrigo lak tumin an rim mek bawk. Striker thar an la lut a, Rodrigo an la lut tel thei a nih bawk chuan EPL-ah champions league-ah pawh champion theihna hun tha nei zui thei tura ngaih an ni.
Arsenal in Zubimendi la lut
