Nilaini zan, zan lai dar 1:45 khian English Premier League-ah inkhel hmuhnawm tak a awm dawn a. Manager thar hnuaiah phur taka inlan Manchester United chu pahnihnaa awm mek Arsenal hmachhawn turin Emirates Stadium-ah an leng lut dawn.
Emirates Stadium-ah United lo mikhual tur Arsenal hi an khelh hnuhnung pahnihah an khel tha hle. Champions League-ah Sporting Lisbon chu an bu zawlah ngei an sawp. Sporting an sawp hnu lawkah West Ham United chu an mualah ngei 5-2 ngawtin an va hneh nawn leh sak. An player hliamte an dam chho a, an match hnuhnung pahnihah an chetthat em vangin inrintawkna sang tak an nei thar leh. An muala inkhel tur an nih bawk vangin Arsenal hi point thum hmu turin an inringtawk hle ngei ang.
Arsenal ang thoin United pawh hi an phur vanglai a n i. Manager thar Ruben Amorim hnuaiah hnehna an chang zawn ta a, EPL-ah table laihawl chung lamah an awm ve leh ta bawk. Red Devils hian Europa League-ah hnehna an chan hnuin Pathianni zana an mikhual Everton chu 4-0 ngawtin an sawp zui leh. Everton an sawp tum hian season kal meka beisei phak lo pahnih; Marcus Rashford leh Joshua Zirkzee ten goal hnih ve ve an thun. Hei hi United tan chuan chanchin lawmawm tak a ni.
Arsenal hi an mualah an chak a nih chuan hmahruaitu Liverpool nen an inkar an tizim thei dawn a. United hneh hi an tan thil thlakhlelhawm tak a lo ni sa reng bawk nen an mualah chak an tum hle ngei ang. Manager thar hnuaiah hmasawn a, phurna leh inrintawkna sang zawk nei turin United in chak an tum hle ngei dawn bawk a. Inkhel hmuhnawm a ni ngei ang.
Arsenal mualah United
