MNF party-in an sawi fo, Article 371G neih theihna turin Pu Laldenga leh Union Home minister inkarah tum thum a palai tih ZPM leader Lalduhoma chuan a sawi.
Kar kaltaa Siaha leh Lawngtlai district-a vantlang inkhawm neia a kalnaah ZPM leader chuan Pathian ram a lo thlenna turin MNF unauten thil sual lian tak an ti mek tih a sawi. “Mizoram himna Article 371G hi kan sawi foa, he Article kan neih theihna tur hian Pu Laldenga leh Home minister inkarah tum thum ka palai. He Article pawh hi BJP hian min paihsak lo ang tih a sawi theih miah loh,” a ti.
Kan ram inrelbawlnaah Pathian ram lo thleng tura theihtawp an chhuah lai leh, mipui pawhin an thlawp tha hle nia ka hriat laiin, hemi kawnga harsatna lian tak siamsaktu chu BJP leh a thurualpui party-te an ni tih Lalduhoma hian a sawi.
“Central-a BJP an sawrkar hnua minority leh Kristian-te tana tha lo dan an pass hnem tawh zia kan hria. Mizorama BJP hi kan ram tana pawi khawih tham leh enghelh tham an ni pawhin kan hre lo. Mahse, state-ah MNF an sawrkar a, BJP an thlawp; NDA an zawm a, an tih loh tawp tur an ti a ni,” a ti.
Citizenship Amendment Bill buaipui lai khan tuna chief minister leh Lok Sabha MP ten nasa taka an do tur thu sawi mah se, a Bill an pulut a, vote an thlak chuan Bill an thlawp thu inchhuang takin an sawi leh si a, NDA an zawm tlat avangin vote tur an tih chu an vote mai tih ZPM hruaitu hian a sawi. Tun hnaiah Manipur issue-ah party dang zawng zawngin No Confidence an move a, Mizoram MP ten an thlawp thu an sawi chu tute emaw chuan a tak tak emaw tiin Airport-ah parthi nen an lo hmuak a, an lo thawp lo tawp niin a sawi. “Parliament-ah vote an lak dawn khan No Confidence thlawptu zawng zawng khan an duh loh zia entirnan pawnah an chhuak vek a, Mizoram MP chu an thu tlat. Thlawp ve ni se chu an chhuak ang,” a ti.
Article 371G neih theihnan tum thum ka palai – Duhoma
