Taylor Swift chu Billboard Artist 100 chart-ah a No.1 a, he chart-a a No.1 tawh zawng zawng chu kar 85 a tling ta. Hetihrual hian Jung Kook pawh No.2 niin, Jimmy Buffett chu No.7-ah a lang thar ve leh ta bawk.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga US-a album leh hla an hralh tam dan te, streaming leh radio airplay te chu tehna pawimawh a ni.
Taylor Swoft hian a album ‘1989 (Taylor’s Version)’ chu kar khatah 2,45,000 a la hralh thei a, Billboard 200 (albums) chart-ah No.1 la niin, a album dang ‘Midnights’ (9), Lover (11), ‘Folklore’ (15), ‘Speak Now (Taylor’s Version)’ (20), ‘Reputation’ (24), ‘Red (Taylor’s Version)’ (25), ‘Evermore’ (27), ‘Fearless (Taylor’s Version)’ (51) leh ‘1989’ (53) te chu chart-ah a la lang bawk. Hot 100 (singles) chart-a pawh a hla 16 a lang mek bawk a, hei hi Artist 100 chart-ah a No.1 pui leh ta a ni.
Jung Kook chu No.100 atangin No.2-ah a invawrh a, ani pawh hian a LP Golden hralh that zar zoin, kar khatah 2,10,000 hralhin Billboard 200 (albums) chart No.2-ah a debut a, he album-a a hla ‘Standing Next to You’ chu Billboard Hot 100 (singles) chart-ah No.5 a ni bawk.
Jimmy Buffett pawh a thih hnuah Artist 100-ah No.7 a rawn ni thar leh a, a album thar ‘Equal Strain on All Parts’ chu Billboard 200 chart-ah No.6 niin, hei hian Artist 100 chart-ah pawh a vawrh sang leh ta a ni.
Billboard Artist 100 Top 10:
1 Taylor Swift
2 Jung Kook
3 Drake
4 Morgan Wallen
5 Zach Bryan
6 Olivia Rodrigo
7 Jimmy Buffett
8 Luke Combs
9 SZA
10 Jelly Roll
Artist 100-ah Taylor Swift a No.1
