Taylor Swift chuan Billboard Artist 100 chart-a No.1 ni ngun ber a nihna sawh nghetin, he chart-ah hian a No.1 leh ta a, he chart-a a No.1 tawh zawng zawng chu kar 64 a tling tawh. Hetihrual hian P!nk pawh No.2-ah a invawrh lut ve leh ta bawk.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga album leh la hralh tam dan te, radio airplay leh streaming te chu tehna pawimawh a ni.
Taylor Swift hian a album ‘Midnights’a la hralh tha hle a, kar khatah copy 54,000 hralh lehin Billboard 200 chart-ah No.3 a la ni a, he album-a a hla ‘Anti-Hero’ chu Billboard Hot 100 (singles) chart-ah No.8 a la ni a, a hla dang ‘Lavender’ chu No.22 a ni bawk a, a live album thar ‘Lover: Live From Paris’ chu Billboard 200 (albums) chart-ah No.58 a nibawk a, heng te avang hian Artist 100-ah pawh a dinhmun a la tha hle a ni.
Tunkar Billboard 200 (alums) chart-ah hian Taylor Swift album 10 a lang thei a Midnights bakah Folklore (No. 28), Lover (No. 41), 1989 (No. 50), Red (Taylor’s Version) (No. 56), Lover: Live From Paris, Reputation (No. 100), Evermore (No. 103), Fearless (Taylor’s Version) (No. 172) leh Speak Now (No. 192) te an ni a, Swift hi zaithiam damlai zingah tum khata Billboard 200 chart-a album 10 lanpui thei awm chhun a ni a, Swift tih lohah hetiang ti thei zaithiam chu Prince, The Beatles, David Bowie leh Whitney Houston te an ni.
Artist 100 chart-ah hian P!nk chu No.61 atangin No.2-ah a invawrh a, ani pawhin a album thar ‘Trustfall’ hralh that zar a zo a, he album hi copy 75,000 hralhin Billboard 200-ah No.2-ah a debut, he album-a a hla Hot 100 chart-ah a lang a awm bawk a, hei hian Artist 100 chart-ah a vawrh sang ta a ni. P!nk hi Artist 100 chart-ah hian tum thum a lo No.1 tawh a ni.
Artist 100 Top 10:
1 Taylor Swift
2 P!nk
3 Morgan Wallen
4 SZA
5 Rihanna
6 The Weeknd
7 Luke Combs
8 Miley Cyrus
9 Drake
10 Harry Styles
Artist 100-ah Taylor Swift a No.1
