Arvind Kejriwal-an a lailang dawn

Arvind Kejriwal chuan Delhi liquor policy scam Aam Aadmi Party harsatna tam tak thlentu leh karkaltaa Chief Minister hial man a nihphahna chungchangah lailan tur turu tak a nei tiin a nupui Sunita Kejriwal chuan a sawi.
Sunita Kejriwal chuan karkaltaa Enforcement Directorate tena an man Chief Minister chu April 9 thlenga an kawl tur chuan ‘liquor scam atanga sum dawn te’ dahna a lailang dawn tiin a sawi.
Chu mai bakah Bharatiya Janata Party (BJP) te chu Kejriwal-an Delhi Public Works leh health Minister te Atishi leh Saurabh Bhardwaj te tihtur a hrilh avanga an sawiselna chu a chhang let bawk.
“Arvinji-an tun hnai kum hnih chhungin probe agencies ED te ang chuan liquor policy case ah raid 250 an kalpui tawh tiin min hrilh a. He scam atanga sum te chu an zawng a, mahse tun thlengin pakhatmah hmuh an la nei lo a ti” tiin Sunita chuan a sawi a.
“Ex-Deputy Chief Minister Manish Sisodia an raid a, Rajya Sabha MP Sanjay Singh an raid a, health minister hlui Satyendar Jain an raid bawk a, paise khat pawh an hmu lo” a ti bawk.
Sisodia leh Singh te hi he liquor policy scam kaihhnawihah tho nikum khan man an ni a, Sisodia hi nikum February thla atangin lung in ah a tang tawh a, Singh erawh nikum October atangin a tang mek thung a. Kejriwal pawh karkalta khan Delhi court-in man theih loh tura phalna a pek duh loh hnuah man a ni zui a ni.
Kejriwal manna chuan Delhi khawpuiah thinrimna a siam nasa hle a. Opposition party te a bik takin Congress leh Bengal-a ruling Trinamool te chuan AAP leader an thlawp thu an sawi chhuak a ni.
“Kan chenna in pawh min dap thut tawh a, Rs 73,000 chauh an hmu a ni. Chuvangin an sawi fo liquor scam a sumte chu Arvinji-an court-ah vawiin a awmna a sawi ang” tiin a sawi bawk.
“Ram pumin an hriatpui ang a, finfiahna a nei a ni” tiin Sunita chuan a sawi bawk a. A pasal chuan Delhi mipuite thuchah a nei ti bawkin chu chu ‘Ka taksa chu lung in-ah, mahse ka spirit in bulah a awm’ a ti tiin a sawi bawk.
Sunita chuan a pasalin Lung in atanga Atishi hnena water supply leh sewerage issue chingfel tura a tihna leh Bhardwaj pawh Delhi government clinic-ah te free medicine supply ngah tawk tura a thupek chu BJP leader tena an sawiselna chu a chhang let nghal bawk.
Kejriwal thupek chhuah hi BJP te chuan na taka sawiselin lung in tang mek Arvind Kejriwal chuan mipuiin khawngaih se a duh vang an ti a. Senior BJP leader Manjinder Singh Sirsa chuan he order lem lutuk duh lo hian ED leh Delhi Lieutenant Governor VK Saxena hnenah complaint ka thehlut tiin a sawi.
“Dan leh constitution kalh a ni a, Delhi mipuite leh Chief Minister office laka criminal conspiracy a ni. Kejriwal hi ED te man mek a ni a, hetiang thupek court phalna tel lova siam tur a ni lo” tiin a sawi a ni.
“Niminah Arvindji hmu turin lung inah ka kal a. Zunthlum nei a ni a, a sugar level a tha lo. Mahse, tumruh takin a awm tlat a. Ni hnih kalta khan Atishi hnenah order a pe a, eng nge tihdikloh a neih? Mipuite harsatna chu a hre lo tur em ni ni dawn? Tunah Centre-in in Chief Minister a bei a ni. Centre hian Delhi tihchhiat vek a duh em ni?” tiin a sawi.
Nimin khan Kejriwal chuan Delhi High Court-ah amah manna chu a khing let a. Senior lawyer Abhishek Manu Singhvi chuan ED te chuan human rights an bawhchhia a ti a.
“Thu zawhfiah pawh awm lova in man hian tuna thleng mek politics thila chetlakna a ni tih a pholang” tiin a sawi a. Singhvi chuan ED te chuan money laundering crime-ah finfiahna engmah an phawrh thei lo a ti bawk.
ED te chuan tuna thiah leh hnawl tawh liquor policy hmangin retailer te chuan profit margin sang tak 185 per cent lawih an nei a, wholesalers ten 12 per cent an nei bawk an ti a. Wholesaller te 12 per cent atang hian 6 per cent – Rs 600 crore chuang chu intham nana hmuhlet a ni a, chu sum chu Goa leh Punjab poll campaign nana hman a ni tiin an sawi.
ED te chuan he liquor scam ah hian Kejriwal chu a sulsutu ber tiin an sawi a. Mahse Kejriwal leh a thawhpuite he thil kaihhnawiha man ex-Deputy Chief Minister Manish Sisodia, Rajya Sabha MP Sanjay Singh, leh ex-Health Minister Satyendar Jain te chuan ED puhna chu an hnawl vek thung.
AAP leh opposition party dangte chuan BJP kaihhruai sorkar chu central agencies heng ED-te ang tte chu inthlanpui hmaa anmahni sawiseltu leh an elpui ber tte laka hmanruaa hmangah an puh a ni.
ED-te chhui mek money laundering case hi kum 2022 daih tawha Central Bureau of Investigation (CBI) tena liquor policy a thil fello a awm tia case an ziahluh atanga intan a ni.
CBI case hi Delhi a Centre sorkar ruat Lieutant Governor VK Saxena an AAP leader te chuan license pekchhuahah tum reng vangin thil fello takin an kalpui tia complaint a thehluh vang a ni a. ED te chuan Kejriwal chu a bultumtu berah ngaiin AAP leader dang te pawh hmer telin an awm bawk.