Kum tir atangin African Swine Fever (ASF) vangin Mizoramin vawk a chan a, kum tawp lamah vanneihthlak takin he hrileng hi a zia ta. ASF vanga vawk thi chu a la awm a, mahse a hma angin a nasa tawh lo.
Mithiamte’n an lo beisei lawk angin thlasikah ASF hrileng hi a zia; November ni 23-ah khan he hri vanga vawk thi hi a awm lo a, May ni 6 hnua ASF vanga vawk thi a awm loh vawi khatna a ni. A tuk November ni 24-ah pawh vawk thi a awm lo leh.
October ni 27-ah khan ASF vanga vawk suat a awm lo a, May ni 6 hnua vawk suat a awm loh ni hmasa ber a ni.
December-ah pawh ASF hi a zia zel rih a, vawk thi leh vawk suat la awm mah se a tlem telh telh.
November thla tawp lamah ASF vanga vawk thi a awm loh ni a awm a, ni 30-ah chuan vawk thi leh vawk suat a awm lo. December pawh chutiang chuan bultan a ni a, ni 1-ah vawk thi leh vawk suat a awm lo. Ni 7 leh ni 8-ah vawk thi leh vawk suat a awm lo a, ni 9-ah pawh vawk thi a awm loh leh; mahse vawk 23 tihhlum/suat a ni. Ni 10-ah pawh vawk thi leh vawk suat a awm lo leh a, ni 11-ah pakhat a thi, vawk suat a awm lo.
December thlaah ni 11 thlengin a ngaihthatthlak a, mahse ni 12-ah a pung leh; vawk 33 a thi a, vawk 26 tihhlum a ni. Ni 13-ah vawk thi a awm lo leh nghal a, tihhlum erawh pakhat a awm.
November thla laihawl vel thleng kha chuan December ni 12-ah vawk thi zat leh suat zat hi a tlem tih tur a ni ang a, tun hnaiah hri a zia tak em avangin 33 leh 26 hi hmuh len a awl ang. AH&Vety department hotute chuan December ni 12-a a pun leh chhan hi vawk farm lianah hri a luh vang a nih thu an sawi a, vawk vulhna hmun hrang hranga mi a ni lo tih an sawi.
ASF hri leng nasa lo telh telh
