Vawk natna hri, African Swine Fever leng mekah sawrkarin dan zawm tura a tih anga zawm lote lakah AH & Vety department chuan hma a la a. Infected area-a puan tawhnaa vawk talh lui leh vawk thi paih chungchangah a ni.
AH & Vety department-in African Swine Fever (ASF) leng laka mipui leh ran himna tura dan zawm tur hriatirna a tihchhuah angin, ASF a leng tih hriatchian, ‘infected area’ department/ magistrate-in an puan tawhna atangin vawk talh, vawksa lakluh leh lakchhuah phal a ni tawh lo a, vawk thi a awmin thuk takah chinai nena phum tura tih an ni bawk.
Hemi zawm lo hian, kumin April 17-a ‘infected area’ puan leh an veng local council lam pawh hriattirna puang tura lehkha pek tawhna, Salem Veng atangin, April 20 khan vawk dam lo talha zawrh report a lut a. Hemi tuma talh leh zuartua sawi hi Sanghluna, Salem Veng tih sawi a ni. April 25 khan he veng atang hian vawk talh a ni tih report dawn a ni leh a, a talhtu leh zuartu hi Darchhuanthanga, Salem Veng a ni tih sawi a ni. Heng mi pahnih lakah hian department chuan police station-ah FIR a thehlut a, an pahnih hian thubuai siamsak an ni.
April 27 (Inrinni) zing khan social media atangin vawk thi kawngthlanga paih a awm thu AH & Vety department hian dawngin, an bawhzui nghal a. Muallungthu leh Samtlangah kalin, Muallungthu VCP chuan April 25 khan Muallungthu leh Tachhip inkara ‘Zuanbak luiah’ vawk thi paih hmuh a ni tih report an dawng a, a rang thei ang berin a hmunah kalin vawk thi chu a lo puam hman tawh avangin leh a rim a lo chhiat tawh avangin thelret/ polythene-in a theih ang anga khuh a nih hnuah kalsan a ni tih a lo sawi a ni. Department hotute nen vawk thi hi damdawi nena sawngbawl hnu ah an phum a, khawtlangah vawk hrileng chungchanga hriat tur inhrilh nise an ti bawk.
Samtlang leh Lungleng inkarah pawh kawngthlanga vawk thi paih a nih thu hriat a nih angin, Samtlang VCP chuan vawk thi paih a awm thu an hriat veleh VC-in hma an la nghal a, vawk vulhtute kokhawmin hmalak dan tur an sawipui tih a lo hrilh. Department hotute nen an sawi ho hnu ah damdawi nen sawngbawlin vawk thi hi a phumtu turten hmanrua dik tak hmang chungin a nih dan tur angin an phum a ni.
Tun dinhmunah Muallungthu leh Samtlangah hian ASF vanga vawk thi report dawn a la ni lo thung.
April 27 thlenga AH & Vety department chhinchhiah danin, ASF avang hian kumin chhungin Mizoramah vawk thi 285 a awm tawh a, ASF hri kai nia ngaih tih hlum (suat) 95 a awm tawh bawk.
8 ASF hian district panga a tuam tawh
8 District a tuam tawh zingah Champhai district-ah a lenna Leithum leh Vanzau bakah Lunglei district-a a lenna Andermanik leh Buknuam te dinhmun a zia rih deuh.
8 Aizawla ASF lenna Salem Veng leh Kulikawnah vawk a la thih belh reng a, he veng pahnih hi kar kalta lam atang khan ‘infected area’ a puan an ni tawh. Maubawk leh Dintharah vawk suat awm mah se, ASF vanga thi ‘confirm’ ala awm lo.
8 Saitual leh Khawzawl district-a Dulte khuaah pawh vawk a la thih belh reng a ni.