Ran natna hrileng, African Swine Fever vangin kuminah Mizoramah vawk 207 an thi tawh a, he hri kai nia ngaih, hri an tih darh lohna atana tihhlum/ suat vawk 95 an awm tawh bawk. Nimin, April 24 bikah khan vawk 5 a thi a ni.
AH & Vety department-in a hriat theih chinah African Swine Fever (ASF) hi district panga – Champhai, Aizawl, Saitual, Khawzawl leh Lungleiah a leng thar tih finfiah a ni tawh a; Champhai district-ah hian Leithum leh Vanzauah, Aizawlah Kulikawn, Salem Veng, Maubawk leh Dinthar; Saitual khawchhung leh an district-a Mimbung khua bakah Khawzawl district-a Dulte ah leh, Lunglei district-a Undermanik leh Buknuamah te ASF hi a lut tawh nia hriat a ni.
Saitual district-ah vawk thi hi an tam ber tawh a, Champhai district-a khaw pahnih bakah Aizawl Salem Vengah ASF thihpui an tam tawh bawk.
Nilaini khan AH &Vety minister C Lalsawivunga hoin department hotuten ASF chungchanga Mizoram dinhmun leh hma lak dan tur an sawi ho a. He hri hian kum 2021 khan Mizoram a luhchilh a, a chenchilh zui tawh. Hri len hmasak ber ai chuan thi leh suat an tlem chho tial tial tih an sawi a, chutihlaiin hmun thenkhatah hri hi a rawn lanchhuah leh thin avangin ranvulhtute tuarna pawi an ti takzet tih an sawi a ni.
Kum 2021 atanga ASF hrileng finfiah a nih hnuah reh tak tak thei loin kum 2022, 2023 leh 2024 ah pawh report hi a awm zel a. Tunhnaia leng thar anga lang hi, 2023 May atang khan thla tin thi report a awm chho a. Khaw lum tan leh ruahtui tlak tan tirh lai hian ran hri chi hrang hrang a hluar thar, tiin an sawi. ASF leng pawh hi kumtin a zia chho telh telh tura beisei a ni tih an sawi bawk.
Minister chuan saa Mizoram a intodelh theih nan department-in nasa takin hma a la a, hetihlaia African Swine Fever a leng leh thin chu pawi a tih thu a sawi. Department-a thawktu officer-te theihtawp chhuah turin a sawm a; ASF beihpui thlaknaah hian mipuiin tha taka department hmalakna tawiawm a, sawrkar dan zawm hram hram turin a chah a ni.
AH & Vety hotute chuan, ASF hi enkawlna damdawi a awm loh avangin fimkhur (biosecurity measures) chu invenna tha ber a ni, an ti a. Ran in intlawh pawh loh, ran damlo leh sa zawrh chhuah loh, ran thite thuk taka phum that, ran in leh a vel damdawi nena tih thianghlim fo tur a ni tih an sawi.
ASF lenna district, khua, thihpui zat leh suat zat (2024 January – April 24)
Khua District ASF thihpui Suat zat
Leithum Champhai 25 13
Vanzau Champhai 17 56
Salem Aizawl 21 0
Maubawk Aizawl 0 4
Kulikawn Aizawl 17 8
Dinthar Aizawl 2 0
Undermanik Lunglei 5 0
Buknuam Lunglei 17 0
Mimbung Saitual 33 0
Saitual Saitual 56 0
Dulte Khawzawl 14 14
TOTAL 207 95