Asia khawthlang buaina atangin Indian 52,000 hruai haw tawh

Asia khawthlang buaina atangin Indian 52,000 hruai haw tawh
Indian external affairs ministry chuan Asia khawthlang lama buaina avanga thlawhna thlawh theih lohna hmun siam thenkhat hawn a nih hnuah Indian tangkhang 52,000 chuangin hruai haw an ni tawh tih a sawi.
Inrinni zan tlai tawh takah khan ministry hian thuchhuah siamin Asia khawthlanga boruak inthlak danglam mek zel hi a vil reng a, bik takin tangkhang mipuite himna a ngaihtuah reng tih a sawi.
Indian la awm mi zawng zawngte chu tual chhung thuneitute kaihhruaina leh India mission-te thurawn pekte zawm turin a chah nawn leh bawk.
Ram pawna Indian-te himna chu sorkarin a ngai pawimawh a, puihna an mamawh zawng zawngte an hmuh zung zung theih nan hma la turin heng laia sorkarte nen an inbe reng niin MEA chuan a sawi.
Asia khawthlang lam rama himna dinhmun chu a la derthawng hle a, US leh Israel tangdunin Iran an la beih chhunzawm zel a, Tehran-in a chhan let nan Israel leh an chhehvela US sipai hmunpui a beih ve mek zel bawk.
MEA chuan, “Indian sorkar chuan Asia khawthlang leh Gulf-a dinhmun inthlak chu a vil reng a, a bik takin ram dang atanga chawl lut leh hun rei lote tlawh tura zin tangkhang Indian-te thatna tur a ngaihtuah reng a ni,” a ti.
“He laia Indian chu tual chhung thuneitute kaihhruaina bakah an awmna hmuna India embassy emaw, consulate-in emaw thurawn a tihchhuah mekte zawm turin hriattir an ni,” a ti.
MEA chuan he biala India mission-te chuan thurawn chipchiar tak tak an pe chhuak tih sawiin Indian-te tanpui nan nileng zankhuaa biakpawh theih helpline an siam tih a sawi bawk.
MEA chuan, “Ni eng emaw zat kalta chhunga thlawhna thlawh theihna thenkhat hawn a nih hnuah India leh ram dang airline-te chuan sumdawng thlawhna leh ruahman lawk loh thlawhna nen heng rama lut zawk emaw, hun rei lote chhung tlawh mek emaw-te chu an kir leh theihna turin thil kalpui a ni,” a ti.
“Tun thlengin Indian 52,000 chuangin heng thlawhnate hi an hmang tangkai tawh a, March 1-7 inkar khan Gulf atangin India ramah him takin hawpui an ni tawh a, heng zinga 32,107 chu Indian carrier-a haw an ni a, thlawhna tam zawk thlawhtir tum a ni,” a ti.