Asia Pacific Leaders Conclave
Health minister-in thu sawi
Thawhtanni khan New Delhi-ah Asia Pacific Leaders Conclave on Malaria Elimination neih a ni a. Mizoram Health minister Dr R Lalthangliana chu khualzahawm niin, conclave hi Union Health minister Dr Mansukh Mandaviya kaihhruaia neih a ni.
Union Health minister-in he Conclave-a tel tura Dr R Lalthangliana a sawm chhan hi malaria umbona kawngah Mizoram chu India rama state thawk tha ber zing ami a nih avanga Mizoramin hma a lak dan sawi tura beisei a nih vang a ni.
Mizoram minister chuan state chhunga Health department hnuaia district pakua zinga panga chu malaria umbo mai thei dinhmunah a din tawh rualin, district pali – Lunglei, Lawngtlai, Mamit leh Siaha ah kumtinin malaria vei an la awm thin a, hmasawnna chak zawk neih theihna’n National Vector Borne Disease Control Programme kaihhruaina hnuaiah Mizoram sawrkar chuan hma a la mek tih a sawi. A bikin malaria tamna district pali ah IRS (DDT kah), LLIN (thosilen chiah sa) sem leh IEC/BCC activity hrang hrang, state leh district task force bakah NGO leh kohhran pawl hrang hrang nen tanghoin theihtawp chhuaha hma lak a ni tih a sawi bawk. Mizoram chu malaria vei hmuhchhuah kawngah India rama thisen exam rate sang ber a nih thu leh sub-centre awmlohna khuaah pawh khawtinah malaria vei hmuhchhuah tuma hma lak a nih thin thu leh malaria veite enkawlna pek vek a nih thu a sawi.
“Asia Pacific Leaders’ Conclave on Malaria Elimination” hi Ministry of Health & Family Welfare leh Asia Pacific Leaders’ Malaria Alliance tangdunin an buatsaih a ni a. Indonesia, Malaysia, Solomon Islands, Fiji, Cambodia, Sri Lanka, Nepal, Thailand, Myanmar leh state thenkhat atanga minister leh palai kalten thu an sawi a. WHO, Niti Aayog, ICMR leh khawvela malaria do kawnga pawl liante an tel.
Conclave-ah hian Malaria joint director, (SVBDCP) state programme officer Dr Chawngthanchhunga chu sawm a nih angin a tel a, Mizoram House OSD (Health) Dr Hmingthankimi a tel bawk.
Asia Pacific Leaders Conclave Health minister-in thu sawi
