‘Asian Cup khelh kan phu tih lantir kan duh’: LZ-a
AFC Asian Cup 2027 Qualifier final round Group C match hniha Singapore hmachhawn tura inbuatsaih mek India forward Lallianzuala Chhangte chuan Pathiannia amah kawmtu AIFF aiawh hnenah Asia khawmualpui huap football-a inelna lian ber khelh ngei an duh tih sawi chungin tournament khelh phu an nih tih pholan an duh tih a tarlang tel.
India team training session luhchhuaha amah kawmtu AIFF oficial hnenah Lunglei tlangval chuan an hmachhawn tur Singapore chu team tha an ni tih sawiin chungin an khelh tawh danah khelmual chhunga tang na thei tak an ni tih an lo pholang tawh niin a sawi zet a, anni pawhin an game khelh thin dan pangngaia an insawrbing tlat tur thu a tarlang ve nghal.
LZ-a chuan squad chhunga mite zawng zawngin an dinhmun khirhzia an hriat thu leh an match khelh tur pahnih atana insawrbing tlat an mamawhzia an hriat chian thu a sawi zet a, “Kan zavai hian he ram hi football kaltlangin inchhuang larh se kan duh a, Asian Cup khelh kan phu tih pholan hi kan duh a ni,” a ti.
Indian national team-a player langsar dang Gurpreet Singh Sandhu pawhin AFC Asian Cup 2027 khel pha tura an insawrbing mek thu a sawi ve bawk.
Tarlan tawh thin ngin, Bengaluru khawpuia head coach Khalid Jamil hoa inbuatsaih mek Blue Tigers hian October ni 9, Ningani hian Singapore an luhkhung ang a, October ni 14, karleh Thawhlehni khian return leg-ah Singapore hi Pandit Jawaharlal Nehru Stadium, Goa-ah an mikhual leh dawn a ni.
Jamil-a naute hian AFC Asian Cup 2027 Qualifiers match hnih an khelh tawh atanga point khat chauh la hum chungin Group C mawngphah an luah mek a; chutih lain heti zat game-ah hian point li hmu tawhin Singapore-in an group hma an hruai thung.
Group tina point hmu sang ber theuh hian AFC Asian Cup Saudi Arabia 2027 an khel dawn a ni.
India dinhmun hi a that loh em avangin Singapore nena an fixture pahnih hi a pawimawh takzet tawh a; he boruakah hian Mizo star player Lianzuala chuan a eng zawngin a thlir a, khelmual chhungah an chance neih chu a hlawk thei ang bera hman an tum tih a sawi.
Mumbai City FC captain Zuala hian head oach thar hnuaia India training session boruak a zangkhai haih tih tarlang telin, “A ni khatna atangin kan training boruak a sangin, a dik zaih a, player tinte chu coach ruahmanna leh duhdan hrethiam tur leh coach ruahmanna mila khel chhuak thei turin kan insawrbing tlaty a ni,” a ti.
India senior men’s national team head coach Khalid Jamil hian player 30 a thlanchhuah atangin Singapore hmachhawn tur 23-member India squad chu Inrinni khan a thlang fel tawh a, an zingah hian Lallianzuala Chhangte bakah Durtlang defender Hmingthanmawia Ralte hmuh tur a awm leh bawk.
Tarlan tawh thin angin, Blue Tigers hian September ni 20 atang khan Bengaluru khawpuiah training an tan a; Singapore pana an thlawhchhuah hmain Jamil chuan dinhmun pawimawh taka an din thu sawiin, “Match li khelh tur kan la neihah kan hmabak hnaivai ber Singapore kan luhkhung tur hi tun dinhmunah kan tana pawimawh ber a ni. A piahlam chu kan la thlir pha rih lo. A la hla lutuk mah mah. A tahtawl te tea kan thlir a ngai,” tiin away hnehna sualchhuah phawt bak ngaihtuah dang a neih rih loh thu a sawi.
Full Squad
Goalkeepers: Amrinder Singh, Gurmeet Singh, Gurpreet Singh Sandhu.
Defenders: Anwar Ali, Hmingthanmawia Ralte, Muhammed Uvais, Pramveer, Rahul Bheke, Sandesh Jhingan.
Midfielders: Brandon Fernandes, Danish Farooq Bhat, Deepak Tangri, Macarton Louis Nickson, Mahesh Singh Naorem, Nikhil Prabhu, Sahal Abdul Samad, Udanta Singh Kumam.
Forwards: Farukh Choudhary, Lallianzuala Chhangte, Liston Colaco, Rahim Ali, Sunil Chhetri, Vikram Partap Singh.
Head Coach: Khalid Jamil
Assistant Coach: Mahesh Gawali
Goalkeeping Coach: Feroz Sherif
Strength and Conditioning Coach: Chelston Pinto