Asian Games khelin Japan rama Aichi-Nagoya-ah thla khat dawn an cham a, hmeichhe hockey-ah an champion hial. Khatia thla khat dawn Games Village-a an cham chhung khan Bible a chhiar thin a, Chanchin |ha bu pali a chhiar zo hman thuak.
Lalthantluangi a ni a, Asia khawmualpuiin hockey thiam a ni tih a hre tawh. Tlang hrang hranga Zo hnahthlakte zingah Asian Games gold medal nei pahnih an awm a, Lalremsiam Hmar Zote lo zawk kha a ni.
A u Siami (Remsiami) ang bawkin a kalna apianga Bible keng thin a ni a, Bible keng lovin a zin ngai lo; “Ka kalna apiangah Bible ka keng zel. Bible ka ken hian ka thla a muang a,” a ti.
Asian Games khel tura an zin chhuah pawh khan a tih dan pangngaiin Bible a pai a, kuminah Thuthlung Hlui a chhiar chhuah tawh avangin, Games Village-ah Thuthlung Thar a chhiar tan. Matthaia, Marka leh Luka ziakte a chhiar chhuak a, Johana ziak erawh a chhiar chhuak hman ta lo.
Hun bituk hnuaia Games Village-a an khawsak lai, inkhelh buaipuia training leh inbuatsaihna hautak tak takin a bawh laia Bible chhiar kha a har ve thin tih a sawi a, “Hun kan neih loh viau pawhin ni khatah vawi khat tal chu ka chhiar,” a ti.
A tih thin dan chu- zan mut dawnah Bible a chhiar thin a, zing thawh hlimah a chhiar leh. Inkhelh hma leh inkhelh zawhah a chhair leh bawk. Asian Games-ah pawh khan a theih phawt chuan chutiang chuan a ti thin.
“Bible chu, ka chhiar loh hian ka rilru a kap tlat a maw, chhiar hram ka duh thin,” a ti.
Thenzawla SAI Training Centre-a inkhelh zira a awm lai atangin a zinna apiangah Bible a keng thin a, a remchan dan ang angin a chhiar thin a ni.
Tluangi hi lehkha chhiar nuam ti mi a ni hrim hrim a, lehkhabu a hmuh phaka awm a chhiar thin. Mahse, tun hnaiah chuan Bible chhiar ngawrh a tum avangin lehkhabu dang a dah rih.
Hockey lamah sang tak a thleng chungin lehkha a la zir a, zir zel pawh a tum. BA semester khatna a zir mek a, “A theih chuan zir zel ka duh,” a ti.
2024 January thlaah khan India junior team-a tel turin Bangalore a pan a, chung lai chuan pawl 12 result a nghak. Pawl 12 chu a pass a, mahse a zir zawm nghal thei ta lo. 2026-27 session atan college admission a ti a, first semester a zir mek.
“Hriat zau nan lehkha hi zir ka duh a, a theih chuan zir zel ka tum,” Tluangi chuan a ti a, “Degree hi neih ve ka duh,” a ti bawk.
Asian Games khel chungin Chanchin |ha bu chhiar
