Asian Police champion Lalruatkima
December ni 6-9, 2024 chhunga Vietnam khawpui Hanoi-a khelh zawh tak Asian Open Police Taekwondo Championship-ah India tan Lalruatkima chuan gold medal a la.
Lalruatkima hian Poomsae Above 35 (Senior 2) huangah khelin, knock out system a khelha ni a; gold medal awrh tur hian Bangladesh leh Vietnam aiawh a hneh hnu final-ah Nepal mi nen intumin, 7.32-7.10 hnehna nen a champion zui ta a ni.
Commonwealth Championship bronze medalist Kima hian kum 1997 khan Aizawl Taekwondo Academy, Electric vengah taekwondo hi zir tanin, Ramhlun South tan leh Mizoram tan state medal 20 bakah national leh international medal – gold 10, silver 10 leh bronze 7 a lo la tawh a, tunah hian 1st Bn. MAP mi leh sa niin, security-ah attached-in a awm mek.
World Police Taekwondo Federation (WPTF) buatsaih Asian Police Taekwondo championship hi Asia khawmualpui huapa buatsaih tum khatna niin, inelna chi hnih – Asian Police Championship leh Asian Police Festival-a then a ni.
Ram hrang hrang 29 atangin police infiammi 2500 chuan an tel a; inelna chi hrang hrang Kyorugi (fighting), Poomsae (form), Kyokpa (breaking), Self-defence leh Taekwondo Aerobic hmangin intihsiak buatsaih a ni.
India aiawh hian mi 10 telin, medal paruk – gold pahnih, silver pahnih leh bronze pahnih bawk an la.
India team hi R. Lalrinmawia, MPS, Senior Sports Promotion Officer, MSSC chuan a hruai a; World Police Federation-in an sawm angin international referee Joseph Thansanga chu championship-ah official a ni bawk.
India team hian December ni 11-ah India an lo thleng dawn a, hemi ni vek hian Lalruatkima hi MATA hotute leh an veng, Ramhlun South-te’n Lengpui airport-ah lo hmuak dawn a ni.
Asian Police champion Lalruatkima
