Assam sawrkarin an state-a dan loa lut Bangladesh mi a hnawhchhuah mekte chuan Mizoram an la rawn pan loa ngaih a ni a. Hetihlai hian Aizawla central armed police force lak mekah state dang mi hnamdang (Vai) 7000 chuang an rawn fuankhawm mek tih sawi a ni.Ningani khan Aizawl-a sub-divisional police officer leh police station-a officer -in- charge ho telin Aizawl SP hoa thutkhawm a ni a. Bengal Eastern Frontier Regulations 1873 hnuaia inner line permit kenkawh mek dan an sawiho.
Kuminah ILP enfiahin Mizoram Police tum 48 an thawkchhuak tawh a, ILP neilo leh hmangsual 281 man tawhin, court-a hruai zel an ni. Police officer kalkhawm chuan hmalak tawhna tha thawkhatin lang mah se, hmalak thar ngai nia hriain, hmachhawp atan ngawrh zawk ILP endik nise an ti. ILP enfiah dan tur ruahmanin, Aizawl veng hrang hrang a veng bil a theih anga tuam tum a ni. Hemi atan hian local council leh NGO-te phungbawma sawm nise, an ti.
Tunlaia Aizawl district-a ILP neih ngai hnamdangte lo luhdan an thlirho a. August 20 atanga September 11 thleng awh tur, Secretariat Security Force leh Assam Rifles rifleman lakna kal mek ‘Combined Recruitment Rally’ vangin intlar tur candidate 7422 Aizawlah an rawn fuankhawm a; ILP dilna a tih tam bakah khawlaia veivak a ti tam tih sawiin, sipai intlar tura lo lut thalaite chu sipai lak a zawh chuan anmahni awmna lama haw leh mai tura ngaih an ni tih sawi a ni. He thil avang hian ngaihthat lohna tur a awmloah an ngai a, hetianga recruitment rally lian a awm leh dawn chuan a tlachawpa ILP dil loin, online-a dil theihna hrilhhriat nise harsatna tam tak a sutkian a rinawm tih sawi a ni.
Thenawm state-a ramdangmi hnawhchhuahna kal mekah an huamchhung a nghawng em tih pawh Aizawl district police hotute hian an sawiho a. Hmalakna hi Assam-a Darrang, Dhubri, Goalpara, Golaghat, Hojai, Morigaon leh Nagaon district an ni a, Mizoram atanga hla tak vek an nih avangin, tun dinhmunah chuan min tihbuaina tur hriat a la nih loh bakah heng district atanga lo lut an awm hriat a la nih loh thu sawin a ni a. Chutihrualin fimkhur thuah erawh ILP checking beihpui thlak laiin uluk lehzuala hma lak tum a ni.
‘Dan loa lo lut laka inven chu kan zavaia mawhphurhna a ni a, hnamdang in luahtirtu, sponsor-tu, a chhawrtu leh mimal tinin dan kengkawhtute pui a, ram a him zel theihnan hma lakpui turin mitin kan ngen a ni,’ an ti.
Assam-a ‘hnawhchhuah’ mekten Mizoram rawn pan loah la ngai
