Assam sorkar chuan sorkar ram leh awm phal lohna hmuna awmte um chhuah hna a thawh chhunzawm zel a, Pathianni pawh khan Golaghat district-a beihpui an thlak lehnaah ramngaw bigha 1,000 dawna zau thianin chhungkaw 350 chuang an chhuahtir.
Rengma Reserve Forest-a ni nga chhung beihpui an thlakah ramngaw bigha 11,000 dawna zauva phal lohva chengte an um chhuah hnuah thuneitute chuan Pathianni khan Nambor South Reserve Forest-ah beihpui an thlak zui leh.
“Gelajan leh No. 3 Rajapukhuri-a phal lohva awmte chu hnawh chhuah an ni a, chhungkaw 350 chuang, bigha 1,000 vela zau chu then fai a ni a. Phal lohnaa awmte um chhuah beihpui thlaknaah hian muanawm taka thil kalpui niin tumah lo hnial pawh an awm lo va, ruahman lawk ang vekin thil kalpui theih a ni,” tiin sorkar chuan thu a chhuah.
Special Chief Secretary M K Yadav, Golaghat District Commissioner Pulak Mahanta leh Senior Superintendent of Police Rajen Singh bakah mi pawimawh dangten hna thawh hi enpuiin dan ang leh kalphung pangngaia thil tihfel a ni.
“Mi hnawh chhuah hna hi dan lova ramngaw chhunga dan lova awmte tihchhuaha ramngaw leh a chhunga chengte nun pangngaia an nun theih nana tih a ni a. Vawiinah pawh ruahman angin thil kalpui a ni a, sorkarin ramngaw tha tun din leh tum leh hum nana hma a lakna ang zela thil tih a ni,” tiin sorkar thuchhuahah tar lan a ni.
Ramngawa chengte um chhuah hna hi Assam forest department-in Golaghat district thuneitu, Assam Police, Central Reserve Police Force leh Nagaland sorkar nena tanghova an thawh a ni.
Assam-Nagaland ramria awm, Sarupathar sub-division huam chhunga Uriamghat district-a Rengma Reserve Forest atanga um chhuahte hi an vaiin chhungkaw 1,500 vel an ni tawh a, a tam ber hi Muslim an ni.
Doyang Reserve Forest huam chhungah cheng chhungkaw 205 pawh chhuak tura hriattirna pek an ni tawh a, Zirtawpni hian then hna thawh tum a ni.
Assam-in phal lohna hmuna chengte um chhuah hna thawk zel
