ASSAM INTHLAN: Mipuiten vote thlak dawn ta

ASSAM INTHLAN: Mipuiten vote thlak dawn ta
Ningani hian Assam-a assembly bial 126-ah mipuiten vote an thlak dawn ta a, chawlhkar thum chhung campaign pawh Thawhlehni tlai khan a tawp.
Rorel lai, BJP leh Congress party hruaitu lawk ber berte chuan campaign chhungin voter-te chu thutiam hmanga hmin tumin nasa takin an bei.
Prime Minister Narendra Modi, Union Home Minister Amit Shah, Defence Minister Rajnath Singh, Health Minister JP Nadda leh BJP National President Nitin Nabin te chuan Assam hi vawi eng emaw zat an tlawh a, vantlang inkhawmah thu an sawi a, saffron party leh NDA tangrual pawlte thlawpna zawngin kawng an zawhnaah an tel bawk.
A lehlamah Congress National President Mallikarjun Kharge-a leh party hruaitu hlun, Rahul Gandhi leh Priyanka Gandhi Vadra-i te chuan an candidate-te leh an thawhpuite tan vantlang inkhawm eng emaw zatah hun an hman ve bawk.
Party dang hruaitute, AIMIM hotu Asaduddin Owaisi te chuan All India United Democratic Front campaign-in phe buai hle a. JMM president leh Jharkhand Chief Minister Hemant Soren-a’n an party-in candidate 16 a neihte puiin vantlang inkhawm 20 chuangah thu a sawi.
Campaign theih hun tawp ni, Thawhlehni pawh khan Union Home Minister Shah-a chuan Patharkandi, Hailakandi leh Cachar-a vantlang inkhawmah thu a sawi a, Congres President Kharge-a pawhin Guwahati-ah thuthar lakhawmtute a kawm bawk.
Assam-ah hian candidate 722 an awm a, an zinga 59 chu hmeichhia an ni a. Vote nei thei mi maktaduai 25.05 (mipa maktaduai 12.53, hmeichhia maktaduai 12.52 leh third gender 318) an awm.
Kum 18-19 inkar zingah hian a vawi khatna atana vote thlak thei mi 6,42,314 an awm a; rualbanlo vote nei 2,05,085 leh kum 100 chung lam 2,466 an awm bawk.
Polling station 31,490 a awm a, heng zinga 4,021 chu hmeichhia vekin an enkawl a, 15 chu rualbanlote enkawl a ni.
Inthlanah hian bial sawi hlawh ber berte chu Chief Minister Himanta Biswa Sarma-a’n tlin nawn leh tuma a beihna, Jalukbari; Congress state unit hotu, Gaurav Gogoi-a a dinna, Jorhat leh Raijor Dal President Akhil Gogoi-a’n a vawi hnih nana tlin leh a tumna, Sibsagar te a ni.