Assam inthlan turah screening committee hotu atan Gandhi-i ruat

Assam inthlan turah screening committee hotu atan Gandhi-i ruat
Congress chuan an party hruaitu, Priyanka Gandhi Vadra-i chu Assam assembly inthlan lo awm tura screening committee chairperson atan ruat a ni.
All India Congress Committee (AICC) general secretary-in Inrinni zan tlai tawh takah khan ruatna hi a tichhuak a. General Secretary (Organisation) K. C. Venugopal-a’n hriattirna a tihchhuahah hian kumin kum chawhma lama inthlang tur – West Bengal, Kerala, Tamil Nadu leh Puducherry screening committee-a mawhphurhna changtu turte a tar lang.
Assam-ah hian AICC general secretary leh Member of Parliament (MP) ni mek, Gandhi-i hian mi pali awmna a kaihruai dawn a. Lok Sabha MP Saptagiri Sankar Ulaka leh Imran Masood bakah Sirivella Prasad te an ni dawn a ni.
Screening committee hian state tina an party-a inrelbawlna kaihhruaina a vil dawn a. Committee tinah hian AICC general secretary in charge, Pradesh Congress Committee president, Congress Legislature Party hruaitu leh AICC secretary zelte chu ex-officio member an ni ang.
Member 126 awmna Assam-ah hian March leh April thla hian inthlang tura ngaih an ni.
Kar tir lamah khan Assam Congress President Gaurav Gogoi-a chuan an party chuan bial 126 awma 100 velah an chuh dawn tih a sawi a, hei hi an thawhpui lian zinga thenkhat chuan an sawisel nghal a, heng zingah hian Raijor Dal chief Akhil Gogoi pawh a tel.
Thla hmasa khan Congress hian CPI(M), Raijor Dal, Assam Jatiya Parishad, CPI, CPI(ML) Liberation, Jatiya Dal-Asom leh Karbi Anglong-a All Party Hill Leaders Conference chuan assembly inthlan lo awm tur hi chuhho ni se tiin an lo inrem tawh.
Tunah hian rorel lai, BJP chuan bial 64-ah MLA an nei mek a, Asom Gana Parishad, United People’s Party Liberal leh Bodoland People’s Front pathumin MLA 19 an nei ve bawk a. Eptu lamah Congress-in MLA 26 an nei a, AIUDF-in 15, CPI(M)-in pakhat leh independent pakhat an awm bawk.
West Bengal-ah chuan Congress hruaitu hlun, B. K. Hariprasad chu screening committee-ah hian chairperson atan ruat a ni a. Dr. Mohammad Jawed, Mamta Devi leh B. P. Singh te a ho dawn a ni.
Screening committee siam hi Congress-in candidate pawh tha taka an thlan chhuaha an thawhpuite nen pawha thawhhona tha an neih theihna tura an ruahman pakhat a ni.