Assam leh Arunachal inkalpawhna dang

Assam leh Arunachal inkalpawhna dang
Assam-a Mising hnam pawl hrang hrangte chuan thla khat liam ta chhunga Arunachal Pradesh-a an hnampui mipa pahnih thah nia an sawite chunga dikna hlen chhuah a nih phutin Thawhlehni atang khan an thenawm state luhna kawngpui an dang.
Takam Mising Porin Kebang (TMPK), Mising Mimag Kebang (MMK) leh Takam Mising Mimé Kebang (TMMK) kaihhruaia kawngpui dan hi Assama Mising hnam kum 22 mi, Prabash Doley leh kum 29 mi, Shankar Pegu te thihna duh lohna avang a ni.
TMPK President Tilak Doley-a chuan kawngpui dan hi zing dar 07:00-ah tanin Assam atanga Arunchal Pradesh luhna kawngpui lian – Banderdewa, Hollongi, Likabali, Roing (Shantipur), Namsai (Dirak) leh Gerukamukh leh hmun dangah an dang tih a sawi.
“Prabash Doley-a a thih hnu khan Arunachal Pradesh home secretary hnenah memorandum thehlutin mipui telna pawl leh zirlaite nen inbiak kan rawt a, hei hi min tihhlawhtlinsak lo va. Tunah hian Shankar Pegu-a thah leh a ni a, kan ngawi thei ta bik lo a ni. Sorkar pawhin min ngaihvena kan inbiak ngei ka beisei,” tiin Tilak-a chuan a sawi.
Doley-a hi June 18 khan Itanagar bul, Chimpu-ah Tai John-a’n a that nia sawi a ni a. Thla khat pawh a la liam lo tih, July 13 khan Pegu hi Roing, Lower Dibang Valley-ah Tadar Bhai-a’n a that leh nia sawi a ni a. Pegu-a hi a tuk zingah a hliam tuar lovin a thi a ni.
Kawng dangtute hian thuchhuah intawm an siamah heng thihna thleng hi ‘rawng’ leh ‘khawngaihna tel lo’ niin an sawi a, a titute man chhuaka dan ang taka man chhuah an phut thu an sawi.
“A tawk tawh em em a. Kan ding tlat dawn a, dikna hlen chhuah hma chu kan kal zel ang,” an ti.
Kawngpui dan hian state pahnih inkara inkalpawhna leh sumdawnna pawh a tibuai dawn a, lungawi lohna lantirtute hian vantlang pawh dikna hlen chhuah a niha ram leilung fate himna tura tanrualpuiah an sawm bawk.
Assam leh Arunachal Pradesh hian kawngpui dan tur chungchangah hian eng thuchhuah mah an nei rih lo thung.