Assam Regiment-ah sports
quota hmang tangkai mek
Shillong Meghalaya-a August 11-13 chhunga Assam Regiment laknaah Mizo thalai an chetha a, sports quota kaltlangin Mizo infiammi 12 tlingin, midang pathumin medical review an nghak mek bawk.
Sipai pangngai (Agniveer) ah pawh Mizoram atangin mi 163 tling tawhin, midang 39-in medical review an nghak mek a ni.
Sports & Youth Services minister Lalnghinglova Hmar leh Assam Regimental Centre Shillong-a commandant Brig. Vikas Rai Shandilya chu kumin July 13 khan Aizawlah an inkawm a, Assam Regiment-a Mizoram-in quota engemawzat a neih hman tangkai a nih tawk loh dan an sawidun. A bikin sports quota-a Mizoram atanga thalai thahnem zawk sipaia an luh dan tur ruahmanna an siam a ni.
Sports minister leh Assam Regiment hotu inbiakna bawhzui hian Mizo Territorial Army Company Aizawl chuan Mizoram atanga sipai intlar turte tan Aizawl-ah pre-recruitment training leh orientation a buatsaih a. Screening-ah hian intlar turte document leh hriselna endik niin, infuihna leh hriat tur pawimawh inhrilhhriat a ni. Inbuatsaihna hi MLA Lt.Col. Clement Lalhmingthanga chuan a enpui a, ruahmanna a siamsak bawk.
Sports & YS department leh Mizoram State Sports Council kaltlangin state sports association hrang hrang chu infiammi, sipaia tang theite zawng chhuaka an hming thehlut tura tih an ni a. Sports quota bikah kum dangah Mizoram atanga lut an awm ngai meuh loa, kuminah infiammi 12 an tling tawh leh tlin belh thei an la awm chu lawmawm a tih thu Sports minister hian sawiin, kum dangah pawh infiammite tana sipaia an luhna tur buaipui zel a nih tur thu a sawi a ni.
Sipai lak pangngaiah pawh screening leh inzirtirna mumal tak neih a nih avangin kum dang aiin document fel lo leh thil hriatsual vanga buaina a tlem tih sawi a ni.
Assam Regiment-ah sports quota hmang tangkai mek
