C. Lalaudinga
Intach Mizoram Chapter
Kum 2025 March 15-a Union Home Minister Amit Shah leh Hon’ble Chief Minister Pu Lalduhoma hriatpuinain Assam Rifles Sector 23 hmunpui Khatlaah Sector 23 Deputy Inspector General Brig. Ginish Upadhya’n GAD Secretary Govt. of Mizoram Vanlaldina Finai hnenah Aizawl khawpui lailia A.R hmun chhuahsan ram Map a hlan ni atang khan Assam Rifles chuan an ram an chhuahsan fel tak thu kan lo hre ta a. Aizawl leh Mizo mipui tan thil lawmawm tak a ni. Amit Shah-a chuan Assam Rifles chhuahsan ram chu tangkai taka mipuiin an hman a duhsak thu a sawi a, “Kum 35 lai mipui duhthusam chu tunah a takin a lo thleng ta a ni,” a ti a.
Assam Rifles chhuahsan ram chu mipuite tana tangkai tak leh a tha thei ang bera hman tumin kan sawrkar dinglai chuan a ngaihtuahtu committee pawh a din ta reng a. Mipui lam atanga mi thahnemngaite’n a hman tangkai dan tur an duhthusam an thlir pawh a tam hle awm e. Mahse, mi tu emaw ngaihtuahna ringawt chu tihhlawhtlin vek chi chu a ni lem lo. Chutih rual chuan, “The Aizawl Post, Ni tin Chanchinbu April ni 26 & 27 – 2026, phek 1-naah chuan, “Mizote hnam ro a him lo” tih kan lo hmu ta a.
Hemi ziaktu hian Assam Rifles chhuahsan ram chhunga building hrang hrang leh Thingte a hmun chenin Mizoram Ancient Monuments and Archeological Sites and Remains Act 2001 anga humhalh tlat turin INTACH (Indian National Trust for Art and Cultural Heritage Mizo Chapter, Aizawl chuan humhalh zel se a duh a, thu leh nei lo in an la ngawih reng thu kan hmu a. A thahnemngaihna hi a ropui a, a zahawm hle mai. Mahse, INTACH hi a ngawi reng lova, a theih ang ang chuan hma a la ve reng thin tih hi kan sawi duh chu a ni.
INTACH hian Central sawrkar leh State sawrkarah hian dan tha taka humhalh hmangin building hlui zawng zawng kum 75 tling tawh chu Art & Cultural Heritage-ah puan vek a tha ber kher lo ang, kan thing leh lung thlengte pawh hian a ni. Kan hmasawnna tur dal thei lutuk chi angte hi tih khera rem lo leh tha lo a awm thei. Kan ram kawng pui kalte hi Heritage site atan humhalh ngawt ila, hma kan sawn thei lo ang. Assam Rifles hmuna kawngpui zauhna tur thingte a awm chuan kan zuah ngawt thei lo, mipuiin hmasawn kan duh, kawng lo dal lutuk kan kih mai a ngai ang. Assam Rifles hmun April thla bul lama thing an kih tan pawh khan, kawng dal leh thil tha zawk tihna tur ni lem lo a thing kih kha a dik chiah lo reng a. Mahse, tul leh mamawhah chuan kih chu a tul bawk ang.
Assam Rifles chhuahsan ram hi mipui tana hman tangkaina ngaihtuah turin kan sawrkar hian Advisory Committee a din nghal a, chung mite chuan a hman tangkai dan tur an rel thin. Chu miah chuan INTACH chuan Quarter Guard Building hi zuaha humhalh turin Building Heritage-ah a thehlut a, remtih a ni tawh bawk.
Tin, building dang Loch Hall etc-te hi chu Building Heritage atan hauh mah ila, mipui hmasawnna thil dang a dal erawh chuan ngaihdan dang awm thei leh sawiho zel tur ang a nih hmel hle bawk. D.C Office kha 17.2.2021 zan khawvar dawn dar 3:15 velah a kan (burn) tak avang khan, a building hlui ang thei bera sak turin INTACH chuan a ti a, sawrkar nen pawh vawi duai lo inbiak a ni. Kan hotute chuan kan duh ang taka duhthusam chu ni chiah loin saktir leh a ni a, tunah an sa zo tep tawh bawk. Treasury kha chu building kang khan tichhe vek lo deuh mah se, a hlui chhe lutuk a, humhalh tlak a ni chiah lo nen, a tharin building dang sak tum niin a lang. Chu loah tunlai chuan Bank chi hrang hrang SBI, RBI, Apex bank leh a dangte pawisa in chu a ni tawh a, Treasury kha a tul dan a awm ta chiah lo bawk.
Tun hnai 14.7.2025-a Lianpui khua Lungphun hlui 86 leh a hmunte National Importance Site atana India sawrkar atanga a han puang maite hi zankhat thil thua an rawn tih a ni lo. He mi an tih theihna tur hian INTACH chuan thangkhat liam ta atang khan hma kan la chho ngat ngat a, bei a dawn rum rum hnuah kan Mizoram tana National Importance Heritage Site a lo ni ta hi kan thiante hi chatuan ram pan ta Pu P. Rohmingthangate, Pu Lianhmingthanga, Pu Thanseia, Pu C. Laitangate leh Pu Ralkhuma te khan hre ve se an lawm ve ngawt ang.
Chutichuan, INTACH Mizoram Chapter hi mi hriat lem loh pawh hian hma kan la ve reng a, tunah hian Lungphunlian khua Lungphun lianpui pui 8 laite, Farkawna Pipu sulhnute leh a dangte pawh hi kan hre reng a ni.
A tawp ber atan chuan, “Mizote hnam ro a him lo, INTACH-in thawm an nei lo,” tih hi thahnemngaihna aw a ni a, lawmawm lamah ngaih sak ila. INTACH hian kan duh zawng zawng hi kan ti seng lo a; tin, mipui tan a tha ber lem lo pawh a awm ang. |ul zual leh loh theih loh pawh hi kan ngah a, kan ti ve reng bawk. National Importance Site lo pawh State Importance Inheritage Site-a dah pawh kan nei nual mai bawk. Tun lai hian Mizoram Lungphun (Megalith) pawimawh lam hma kan la mek bawk a, hei pawh hi thil namai lo tak a ni e. A thu rawn ziak hi min titangtu leh mipui min finchhuahtuah tang hlauh teh se.
A tawp ber atan chuan Assam Rifles chhuahsan ram hi sawrkar siam committee-te kut a ni a. A tul dan a zirin mipuiin tawiawm ila, INTACH Mizoram Chapter hi a awm mai mai lova, a theih ang ang chuan hma an la reng a, an duh ang erawh chuan hma an sawn chak lo zawk a ni e.