Aizawl khawpui laili atanga Assam Rifles sawn chhuah tumnaah sawrkar laipui hotute rawtna angin Aizawla inbiak turin an la nghak mek tih chief minister Lalduhoma chuan a sawi. Thawhlehni khan Mizoram Legislative Assembly term kal meka thutkhawm vawi 3-na tur chu tan a ni a. Zawhna leh chhanna hunah MNF member Robert Romawia Royte zawhna chhangin Home minister K Sapdanga chuan, Ministry of Home Affairs-in Mizoram sawrkarah Assam Rifles insuanchhuak tura hriattirna chu 2019 February 19 leh 2020 March 11 khan a tichhuak tawh a tih a sawi.
Zawhna neitu hian zawhbelhna siamin, Assam Rifles insawhchhuahna turah inremna thuthlung (MoU) siamah Union Home minister sawi ang a ni loa, state sawrkarin comment a lo pek tawh chu sawrkar tharin a bawhzui em tih RTI dan hmanga zawhnaah sawrkar thar hian hma a la lo nia a lan thu a sawi a ni.
House leader, chief minister Lalduhoma chuan Mizoram sawrkar leh Assam Rifles-in an a hranin MoU an draft ve ve tih sawiin, hei hi sawikhawm awm loin an dah tawp a, an sawrkar hnu ah a kaihhnawih state sawrkar department leh AR lam nen sawiin an thukhawm a. An ngaihdana inang lo awmte chinfel tumin hma an la tih a sawi.
Union Home minister-in Aizawl laili atangin AR an chhuah a ngai tih sawiin, Home ministry kaihhruaina hnuaiah kil thum atanga inbia a, duhdan inanlohna chinfel dan ngaihtuah tura a rawt bakah kar khat chhunga tihfel an tum tur thu a rawn sawi chu a lo sawichhawng ve ngawt a, mahse, AR-in MoU hi an draft tha leh duh a, chu chu an nghak tih Home ministry hian an sawi leh si niin a sawi.
“Tunhnaiah Union Home minister nen kan sawidun leh a, Home ministry atangin joint secretary leh Intelligence Bureau atangin senior officer pakhat Aizawlah ka rawn tir chho anga, in inbe dawn nia, a ti a. Vawiin thlengin a la rawn tir lo. Khu lam atanga kan thu hriat ang zawng zawng hi mipui hriata sawichhuah loh a him dawn a nih hi ka ti a. Sawrkar hmasa pawhin a experience in ka hria,” a ti.
“Union Home minister duhdan chuan, thla thum dan zelah a phase angin insawn se, kum khat chhunga tih zawh vek turin a ti a, tak tak a ni dawn nge ka hre lo,” chief minister hian a ti bawk.
Zawhna neitu Robert Romawia Royte chuan RTI-a zawhnaah MNF sawrkar laiin MoU draft siam a ni lo tia chhan a nih laiin, chief minister-in sawrkar hmasa in MoU a siam leh Assam Rifles-in MoU a siam a awm a tih chu a sawichhuak a. Chief minister hian RTI zawhna chu official-ten an lo draft thin a ni a, a minister concern-ten an lo enpui hman loh phei chuan tihsual palh a awm thei, tiin, “House-a tuna kan sawi hi thudik zawkah pawm ila,” a ti.
Assam Rifles sawnchhuah turah Aizawla inbiakna tur kan nghak – Chief minister
