Assam tuilian chuan July 10 khan ziaawm lam panin tui chimchin a tlahniam nasa tawh hle a, hei vang hian district 26 a tuilian tuar mipui 1.7 million te dinhmun pawh ziaawm zual tura ngaih a ni.
Mahse ram zau tak chu tuiin a la chim tho va, district thenkhatah chuan ruah a la sur reng tho bawk.
July 9 khan nunna chan pasarih awmbelhin Cachar ah pasarih, Dhubri, Dhemaji, South Salmara, Nagaon leh Sivasagaah ah pahnih theuh an awm tiin Assam State Disaster Management Authority (ASDMA) thuchhuah chuan a tarlang.
Kumin Assam tuilian, leimin leh thlipui avangin nunna chan 92 an awm tawh a, tuilian bik avanga nunna chan chu 79 lai an ni. thlai chinna hmun 38,870.3 hectares chu tuiin a la chim reng bawk.
Tuilian hian Dhubri district khawihna berin mi 3,54,045 te a tibuai hle a, Cachar (1,81,545), Sivasagar (1,36,547), Barpeta (1,16,074) leh Golaghat (1,09,475) te chu a nasatna zual deuh an ni bawk.
Relief camp 507 siamah mi 48,021 an awm a, relief material te chu heng camp pawnah hian 1,04,665 semchhuah a ni bawk.
Tuilian hian Dhubri, Cachar, Kamrup, Goalpara, Lakhimpur, Dibrugarh, Charaideo, South Salmara, Nalbari, Karimganj, Dhemaji, Morigaon, Nagaon, Sivasagar, Golaghat, Sonitpur, Hailakandi, Biswanath, Barpeta, Darrang, Kamrup (M), Majuli, Jorhat, Kokrajhar, Tinsukia leh Chirang districts te chu a tibuai hle a ni.
Khawpui tuilian pawh Kamrup (Metropolitan) district hnih, Dibrugarh leh Karbi Anglong ah te a thleng bawk a. Kaziranga National Park chuan tun hnaia tuilian nasa ber tawkin hei vang hian ransa 159 in nunna an chan a, ransa 133 te chu chhanhimin an awm thung.
Tuilian avang hian kawngpui 94, lei pathum, chenna in 26 leh embankment paruk te tihchiatin a awm a ni. Brahmaputra River chu Nimatighat, Tezpur, Guwahati leh Dhubri ah te hlauhawm chhinchhiahna chungah a la lung reng a. Lui dang Burhi Dihing, Dikhou, Disang, Kopili leh Kushiara te pawh hmun hrang hrangah hlauhawm chhinchhiahna chungah an la luang bawk.
Assam tuilianin ziaawm lam pan
