Assam zirtirtute ‘dress code’ barhluih tum

Assam higher educational institutes-a zirtirtute chu casual thawmhnaw T-shirts, jeans leh leggings te an hnathawhnaah ha tawh lo tura hriattir an ni.
State sorkarin dress code chungchang a tihchhuahah heng thuamhnawte hi ‘a changin mipui ten an pawm lo’ tiin a sawi a.
“Higher educational institutes a zirtirtu thenkhatte chuan an duh ang thuamhnaw an ha mai thin a, chung te chu a chang chuan mipui nawlpui tena an pawmpui loh a ni” tiin State’s Higher Education Department notification tihchhuah chuan a tarlang.
Sorkar chuan zirtirtu mipate chu an hnathawhnaah formal shirt leh trouser emaw dhoti-pyjama te ha turin a ngen a. Hmeichhia zirtirtute pawh ‘zahawm’ takin salwar suit/saree/mekhela-chador leh traditional attires te ha turin a ngen bawk.
Notification chuan zirtirtu mipa leh hmeichhiate chu fai tak, zahawm tak leh colour nei nuai lo leh langsar tak lovin inchei se ti bawkin casual leh party apparel lama inthuam loh ni se a ti bawk.
Sorkar thuchhuah chuan zirtirtute chu zahawm tura ngen an nih thu sawiin a bik takin an duty tih lai phei chuan a ni zual an ti a. An incheina te chu zahawm tak, professionalism lantirna bakah hnathawhna hmun milin a ni tur a ni an ti bawk a.
Sorkarin dress code chungchang a sawi hian ngaihdan phir a siam nghal a. Traditionalist tena a tha an tih laiin thenkahtte chuan sorkar chuan a hmasa berin zahawm tih leh zahawm lo tih te chu sawifiahna siam phawt rawh se an ti ve thung. Assam State sorkar hian May thla khan school zirtirtute tana dress code hi a lo tichhuak tawh bawk.