Mizoram Legislative Assembly 9-na, thutkhawm vawi 4-na leh Budget Session ni bawk chu Nilaini khan tan a ni a. 2025 March 20 thleng a awh ang. A hawnna inkhawmah larsap Gen Vijay Kumar Singh (Retd) chuan Budget Session chu sawrkar pawisa lut leh chhuak tarlanna satliah mai nilo, mipui tana sawrkar hmachhawp leh ruahman tarlanna a ni tih sawiin, “Assembly Session-a kan thil sawiho leh rel hian mipui tan hmasawnna a thlen ngei ka beisei,” a ti.
Mizoram Legislative Assembly-in rorelna kalphung zahawm tak vawnhim kawngah sulhnu duhawm tak a nei tawh thin tih a sawi a. Member-te chu he sulhnu chhuanawm tak hi chhawmnung zel turin a sawm.
Sawrkar hmalakna, hmachhawp leh ngaihpawimawh hrang hrang a sawi a. Ram hmasawnna atan remna leh muanna vawnhim chu thil pawimawh tak a ni, tiin, Mizoram Police-in rim taka khua leh tui venhim hna an thawh azarah kum 2024 chhung khan Mizoramah dan leh thupek kenkawh kawngah harsatna liantham thleng a awm lo a tih theih tih a sawi.
Mizoram Police hian state dang nena kan ramriah harsatna a thlen lohnan ngawrh takin hna an thawk reng tih larsap hian a sawi a. Ramdang nena kan ramrite hmelma laka venghim turin Assam Rifles leh Border Security Force nen tanghoin, venhim hna khauh takin an kalpui thin tih a sawi a ni.
Bana Kaih Policy inkaihhruaina tarlan danin, he scheme hnuaia hmalakna kalpui dan tur hlawm (component) ngaa then a ni a. Chu’ng zinga pakhat, “Handholding to Progress Partners” ah sawrkar thawhpui bank leh financial institution-ten ‘progress partners’ hnenah loan an pe anga, sawrkar chu heng mite tan hian ‘credit guarantee scheme’ awmsa hmangin guarantor-ah a tang dawn tih a sawi a ni.
“Mahni kutkawiha sumndawnna leh thildanga eizawnna bultan tur ten an hlawhtlina theihna atan an mamawh sumfai pek theihnan ‘Mizoram Bana Kaih Venture Capital Fund’ chu bul tan thuai tum a ni,” Gen Vijay Kumar Singh (Retd) hian a ti.
Vawiin, February 20 hi Mizoram State Day a ni a, sawrkar chawlh a nih avangin Assembly Session hi neih a ni loang. Naktuk, February 21 ah chhunzawm a ni ang.
Assembly Budget Session nei tan Larsap-in sawrkar hmalakna sawi
