Assembly Committee-in corporation hotu atan political appointment tihtawp a rawt

Assembly Committee-in corporation hotu
atan political appointment tihtawp a rawt
Mizoram Legislative Assembly-a Committee on Public Undertakings (COPU) (2024– 2026) chu Nilaini khan House-ah an chairman H Ginzalala’n a pharh.
Report chi hrang hrang pali, Commerce & Industries department hnuaia awm – First Report relating to Mizoram Agricultural Marketing Corporation Limited (MAMCO), Second Report relating to Mizoram Food & Allied Industries Development Corporation Limited (MIFCO), Third Report relating to Zoram Infrastructure & Industrial Development Corporation Limited (ZIDCO) leh Fourth Report relating to Mizoram Handloom & Handicrafts Development Corporation Limited (ZOHANDCO) an sawrkarin a bawhzui dan leh hma a lak dan he report-ah hian tarlan a ni a, recommendation a siam belh chu tarlan a ni bawk.
COPU (2024- 2026) hian PSU pali – MAMCO, MIFCO, ZIIDCO leh ZOHANDCO chungchang hi hun rei tak a zirchiang a. Departmental discussion tum hnih neiin, spot study visit a nei a. Oral evidence a neih bakah chief minister leh Commerce & Industries minister pawh an kawm a ni.
Committee hian rawtna hrang hrang a siam a. MAMCO hian a din chhan ber agricultural activities a kalpui tawh loa, construction works chauh a khawih tawh a, thawktu tamzawk hi engineer an ni. ZIIDCO hian construction works a khawih bawk a. Chuvangin, heng corporation pahnih hi chhunfin nise tiin a rawt.
MAMCO leh ZIIDCO chhunfin hnu hian nodal department – Commerce & Industries atanga Finance department-a dah a, MF&AS-in deputation-a a chelh tur finance & accounts officer post siam a, works department khawi emaw ber atanga chief engineer-in corporation hi a hna pangngai bakah enkawl tel turin a rawt bawk.
PSU pali tan hian a bikin chairman leh managing director-te political ground-a ruat ni tawh lo se, chief minister, Legislative Assembly speaker, leader of opposition /group leader telna Search -cum- Selection Committee din nise, corporate lama sulhnu nei tha tak ngei ruat ni tawh se, a ti a ni.
MIFCO bikah Aizawl Municipal huamchhunga vawk talh hi, vawk talhna hmun bikah chauh talh nise, hemi atan hian ‘Pork and Poultry Processing Plant’ Bungbangla Zemabawkah talh nise, tihchangtlun lehzualna atan sum dahhran nise, local fruit beverages siamchhuah, hralh leh supply a nih theihnan concerned authority-ah license dil nise tih a rawt.
Committee on Public Undertakings-ah hian member 6 – Ramthanmawia, K Laldawngliana, K. Hrahmo Lt.Col. Clement Lalhmingthanga, V Malsawmtluanga leh Lalramliana an awm a ni.