Asst. professor qualify lo ban
phutin zirlaiin kawng zawh tum
Assistant professor zinga danin a phut ang tlin lo ho ban tura sawrkar an phutna tih hlawhtlin a nih loh avangin Mizo Students’ Union chuan vawiin – Thawhtanni hian Aizawlah kawng zawh huaihawt an tum.
MSU Gen. Hqrs. hian danin a phut ang nei pha lo college hrang hranga assistant professor 29 chu 2024 August 9 khan 2025 February 28 thleng chhawr chhunzawmna lehkha a lo tichhuak tawh a, chuta a inziah danah chuan, hemi bak hi chu an thawh hun chhung pawhsei sak tawh loh tur (no more extension of engagement will be done after 28.02.2025) a intih tawh hnuah kumin February 21 khan hun pek belhna notification a chhuak leh si tih an sawi.
Kumin March 13-ah thuthar thehdarhtute kaltlanga he thil an duh loh thu an lo auchhuah pui tawh bakah Higher & Technical Education minister hnenah vawi tam an thlen tawh a, June 9 khan chief minister hnenah an thlen tawh bawk tih sawiin, an thu thlenin awmzia a nei loa, ngaihpawimawh a hlawh lo, tiin, July 1 khan an hun pawhseina order hi an hal tawh a ni.
Notification an kal ni hian H&TE director hnenah ziakin lehkha an pe nawn a. 2025 July 6 ralhmaa an ngenna hi ngaihpawimawh a nih loh chuan zirlaiten zirtirna tha an dawn theihnan qualify ngei zirtirtu an duh thu Aizawl khawpuiah kawngzawhin tlangaupui an tum tih an lo sawi lawk tawh a ni.
Chawhma dar 10.30 ah Vanapa Hall kawt atangin Higher & Technical Education directorate thleng “Quality Education Humhalhna Kawngzawh” neih an tum tih MSU hian sawiin, Aizawla college zirlai zawng zawng tel turin a sawm tih an sawi a. Mizoram sawrkar chu unqualified ziritirtute ban a, an aiawh tur zirtirtu pawh zirna tibuai loa la nghal turin an ngen tih an sawi a ni.
Aizawl City College Joint Students’ Union chuan thuchhuah siamin, MSU-in kawng zawh an neih tur hi an thlawp tih an sawi a. Hemi ni hian Student’s Union hruaitute leh college zirlai zawng zawng kawng zawh tura Vanapa Hall kawt pan khawm turin an sawm tih an sawi a ni.
Asst. professor qualify lo banphutin zirlaiin kawng zawh tum
